Qazaqstanda jyl basynan beri 266 mınımarket pen 90 sýpermarket ashyldy

ASTANA. KAZINFORM – 2025 jyldyń qańtar-qyrkúıek aılary aralyǵynda Qazaqstanda jalpy aýdany 43 myń sharshy metr bolatyn 266 mınımarket paıdalanýǵa berildi, dep habarlaıdy Ulttyq statıstıka bıýrosy.

Ashylǵan nysandardyń jalpy quny 16,1 mıllıard teńgeni qurady. Mınımarketterdiń eń kóp sany Túrkistan oblysynda (35 nysan) jáne Atyraý oblysynda (32 nysan) tirkeldi.

Sonymen qatar atalǵan kezeńde el boıynsha jalpy aýdany 63,7 myń sharshy metr bolatyn 90 sýpermarket paıdalanýǵa berildi. Olardyń jalpy quny 34,5 mıllıard teńgege jetti.

- Sýpermarketterdiń basym bóligi Shymkent qalasynda (31 nysan) jáne Jambyl oblysynda (19 nysan) ashylǵan, - dep jazdy vedomstvodan.

Mamandardyń aıtýynsha, saýda ınfraqurylymynyń qarqyndy damýy óńirlerdegi shaǵyn jáne orta bıznestiń belsendiligin arttyrýǵa, sondaı-aq turǵyndarǵa qolaıly saýda formattaryn usynýǵa múmkindik berip otyr.

Aıta keteıik, Saýda mınıstrligi áleýmettik mańyzy bar azyq-túlik baǵasyn baqylaýdy kúsheıtedi.