Qazaqstanda jyl basynan beri 145 radıkaldy sheteldik elden shyǵaryldy
ASTANA. KAZINFORM — Qazaqstanda jyl basynan beri radıkaldy kózqarasty ustanǵan 145 sheteldik azamat ustalyp, el aýmaǵynan shyǵaryldy. Bul týraly Astanada ótken Túrki memleketteri uıymyna (TMU) múshe elderdiń ishki ister mınıstrleriniń kezdesýinde aıtyldy.
Kezdesýde transulttyq uıymdasqan qylmysqa, ekstremızm men terrorızmge qarsy is-qımyl máseleleri talqylandy.
Qazirgi tańda qylmystyq toptar birneshe eldiń aýmaǵynda qatar áreket etip, tsıfrlyq tehnologııalardy paıdalanady. Olar óz baǵyttary men jasyryný tásilderin únemi ózgertip otyrady. Osyǵan baılanysty quqyq qorǵaý organdary arasyndaǵy tikeleı baılanys pen jedel aqparat almasýdyń mańyzy artyp keledi.
Qazaqstan ІІM-niń málimetinshe, halyqaralyq yntymaqtastyqtyń nátıjesinde birqatar qylmysqa qatysy bar adamdar ustalǵan.
Atap aıtqanda, Qazaqstan tarapynyń suraýy boıynsha Ázerbaıjannyń quqyq qorǵaý organdary Bakýde dinı radıkaldy ustady. Ózbekstanda terrorızmdi nasıhattaǵany jáne uıymdasqan qylmystyq topqa qatysqany úshin Qazaqstan izdeý jarııalaǵan adam, al Qyrǵyzstanda áleýmettik arazdyqty qozdyrǵany úshin izdeýde júrgen azamat ustaldy.
Sonymen qatar túrkııalyq áriptesterdiń kómegimen Ystambulda Qazaqstan azamatynyń ólimine qatysty qylmys ashyldy.
— Búginde kóptegen qaýip-qater bir eldiń shekarasymen shektelmeıdi. Sondyqtan qyzmetterimiz arasyndaǵy tikeleı baılanys pen aqparatty ýaqtyly almasýdyń mańyzy erekshe. Shetelge jasyrynýǵa tyrysqan adamdardy jedel anyqtap, ustaýǵa tek birlesken jumys múmkindik beredi, — dedi QR Іshki ister mınıstri Erjan Sádenov.
Qazaqstan tarapy TMU-ǵa múshe elderdiń tıisti bólimsheleri arasynda transulttyq qylmysqa, ekstremızm men terrorızmge qarsy is-qımyl boıynsha jedel aqparat almasýdy jáne tikeleı ózara baılanysty kúsheıtýdi usyndy.
Eske salaıyq, buǵan deıin Jambyl oblysynda dinı radıkaldar tobynyń 11 múshesi ustalǵanyn habarlaǵanbyz.
