Qazaqstanda jıhaz ónerkásibi qarqyndy damýda
Ortalyqtyń málimetinshe, búginde elimizde 1491 shaǵyn jáne orta kásiporyn jumys isteıdi, olar osy jyldyń 10 aıynda 49,3 mlrd teńgege ónim óndirdi, bul nomınaldy mánde 2020 jyldyń tıisti kezeńiniń kórsetkishinen 16,5 mlrd teńgege joǵary.
«Naqty kólem ındeksi aıtarlyqtaı ulǵaıdy 114,9% jetti. Onyń ósimi salanyń barlyq sektorlarynda qamtamasyz etilgen. Bul rette óndiris kóleminiń edáýir ósýi keńseler men saýda kásiporyndaryna arnalǵan jıhaz óndirisinde 1,4 ese baıqalady», delingen habarlamada.
Ortalyqtyń málimetine sensek, otandyq jıhaz ónerkásibiniń ónimderi kórshi elderde suranysqa ıe.
«Eksporttyń negizgi kólemi Reseı, Qyrǵyzstan, Ózbekstan, Tájikstan jáne Belarýs elderine baǵyttaldy. 2021 jylǵy qańtar-qazan aralyǵyndaǵy kezeńde eksport kólemi 2020 jylmen salystyrǵanda 1,5 ese ulǵaıdy», delingen habarlamada.
QazIndustry mamandarynyń pikirinshe, qazaqstandyq jıhaz jasaýshylardyń áleýeti óte úlken, sebebi ımporttyq ónimdi Reseı, Túrkııa, Belarýs, Qytaı jáne Italııadan jıhaz ónimderiniń sapasy men dızaıny boıynsha kem túspeıtin otandyq taýarlarmen almastyrý esebinen ishki naryqta óziniń qatysýyn aıtarlyqtaı keńeıtýge múmkindik bar.
«Jıhaz óndirý sektory qarqyndy damyp keledi, jańa kompanııalar men jeke kásipkerler paıda bolýda, osylaısha otandyq naryqta básekege qabilettilik ósýde. Jyldan jylǵa elimizde turǵyn úı qurylysy belsendi júrip jatyr, bul jıhazǵa degen qajettilikti arttyrady», - dep atap ótti QazIndustry Salalyq damý dırektsııasynyń bas sarapshysy Beısenbek Baımaǵulov.
Jyl basynan beri jıhaz kásiporyndarynyń sany 1,3 esege artty. Jıhaz kásiporyndarynyń ósýi boıynsha óńirler arasynda Shymkent qalasy kósh bastap tur, onda 400-den astam kásiporyn bar.
Sondaı-aq, 2021 jyly Nur-Sultan qalasynda, Batys Qazaqstan jáne Túrkistan oblystarynda jıhaz korpýstary men aǵashtan buıymdar shyǵarý boıynsha birqatar ınvestıtsııalyq joba iske qosyldy. Osylaısha, atalǵan fabrıkalardyń óndiris qýattylyǵy jylyna 30 myń birlik jıhaz ónimin quraıdy, bul óz kezeginde 165 jumys ornyn qurýǵa múmkindik berdi.
