Qazaqstanda JI arqyly qoǵamdyq oryndarda táýlik boıy beınebaqylaý qosylady

ASTANA. KAZINFORM — Aldaǵy ýaqytta «Ulttyq beınebaqylaý júıesi» engiziledi. Bul týraly Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev málimdedi. 

— Beıbitshilik pen ádiletti qoǵam ornatý úshin jáne memlekettik ınstıtýttardyń tıimdiligin arttyrýda zamanaýı tehnologııalardyń róli erekshe. Atap aıtqanda, jasandy ıntellekt quqyqtyq qyzmetterdiń sapasyn arttyryp, quqyq qorǵaý organdarynyń jumysyn jedeldetýge jáne azamattardyń quqyqtaryn qorǵaýǵa kómektesedi, — dedi Jaslan Mádıev Senatta Ornyqty damýy salasyndaǵy ulttyq maqsattardyń iske asyrylýyn monıtorıngileý jónindegi parlamenttik komıssııanyń XI otyrysynda.

Onyń aıtýynsha, osy baǵytta mınıstrlik quqyq qorǵaý organdarymen birlesip birqatar jobany iske asyryp jatyr. Mysaly, «Quqyqtyq keńes berý JI-agenti» azamattardyń suraqtaryna naqty jáne jedel jaýap berip, quqyqtyq aqparatqa qoljetimdilikti jeńildetedi.

Aldaǵy ýaqytta «Ulttyq beınebaqylaý júıesin» engizý josparlanǵan. Bul júıe jasandy ıntellekt arqyly qoǵamdyq oryndarda táýlik boıy beınebaqylaýdy qamtamasyz etedi.

— Júıe adamdardyń bet-álpetin, kólik nómirlerin avtomatty túrde tanıdy, kúmán týdyratyn jaǵdaılardy — tóbeles, adamdardyń jınalýy nemese umyt qalǵan zattardy tirkeıdi. Osynyń arqasynda qoǵamdyq qaýipsizdik deńgeıi edáýir artyp, quqyq qorǵaý organdarynyń áreket etý jyldamdyǵy kúsheıedi, — dedi mınıstr.

Budan buryn habarlanǵandaı, búgin Parlament Senatynda Qazaqstannyń Ornyqty damýy salasyndaǵy ulttyq maqsattar men mindetterdiń iske asyrylýyn monıtorıngileý jónindegi parlamenttik komıssııanyń XI otyrysy ótti.