Qazaqstanda JI ýnıversıteti ashylyp, kıbersporttan álemdik doda ótedi
ASTANA. KAZINFORM – Qazaqstan tolyq tsıfrlanǵan memleket qurýǵa kiristi. Elde Jasandy ıntellekt týraly zań qabyldanyp, jańa Konstıtýtsııada azamattardyń tsıfrlyq quqyqtaryna kepildik berildi. Bul týraly Memleket basshysy Qasym-Jomart Toqaev «Bolashaq oıyndary – 2026» halyqaralyq týrnıriniń resmı ashylýynda aıtty.
Óz quttyqtaýynda Prezıdent qazir búkil álemde túbegeıli ózgerister bolyp jatqanyn erekshe atap ótti.
– Ozyq tehnologııalar barlyq salaǵa enip, adamdardyń turmys-tirshiligine yqpalyn tıgizýde. Jańa dáýirdiń talaptaryna saı bolý úshin biz tolyq tsıfrlanǵan memleket qurýǵa kiristik. Qazaqstan Parlamenti Tsıfrlyq kodeks jáne jasandy ıntellekt týraly arnaıy zań qabyldady. Bul zańdar asa mańyzdy salanyń damýyna úlken serpin berdi. Basqasha aıtsaq, bul qadam elimizdiń ozyq memleketter qataryna qosylýynyń aıqyn dáleli boldy, – dedi Memleket basshysy.
Sonymen birge, 1 shilde kúni elimizdiń jańa Konstıtýtsııasy zańdy kúshine endi. Bas qujatta elimizdegi jasandy ıntellektiniń joǵary qarqynmen damýyna jáne azamattardyń tsıfrlyq álemdegi quqyǵyn qorǵaýǵa naqty kepildik berildi.
– Bul – shyn máninde buryn-sońdy bolmaǵan ıaǵnı órkenıetke qaraı jasalǵan ozyq qadam. Biz osy jyldy «Tsıfrlandyrý jáne jasandy ıntellekt jyly» dep jarııaladyq. Osylaısha tsıfrlyq bolashaqqa nyq senimmen aıaq bastyq. Bul memleketimizdiń aldynda turǵan asa mańyzdy strategııalyq maqsat. Osy mindetti bárimiz birtutas qoǵam retinde tabysty iske asyrýymyz qajet. Sondyqtan qazir elimizde jańa zamanǵa qajetti mamandar daıarlaý isi turaqty túrde júzege asyrylyp jatyr, – dedi Qasym-Jomart Toqaev.
Qazaqstanda AI Sana memlekettik baǵdarlamasy arqyly qazirdiń ózinde júzdegen myń azamat tıisti quziretter men daǵdylardy meńgerdi. Bıyl kúzde Astanada JI ýnıversıteti ashylady.
– Elimizde neırojeli kómegimen túsirilgen fılmderdiń halyqaralyq festıvali ótedi. Sondaı-aq kelesi jyly elordamyzda Halyqaralyq kıbersport federatsııasynyń qoldaýymen álemdik doda uıymdastyrylady. Bul Qazaqstanda iske asyp jatqan aýqymdy bastamalardyń bir bóligi ǵana, – dep túıindedi Prezıdent.
Aıta keteıik, Astanada «Bolashaq oıyndary – 2026» týrnıriniń ashylý rásimi ótti. Týrnır Astanada 29 shilde men 9 tamyz aralyǵynda ótedi. Jarysqa 34 elden 800-den astam sportshy qatysady.
Prezıdent Teleradıokesheni «Bolashaq oıyndary–2026» týrnıriniń televızııalyq túsirilimin jasaıdy.
