Qazaqstanda JI-terapevt pen feldsherdi qorǵaıtyn vıdeojeton jasaldy

ASTANA. KAZINFORM — «Qazaqtelekom» AQ basqarma tóraǵasy Baǵdat Mýsın Digital Bridge forýmynda Densaýlyq saqtaý mınıstrligimen birlesip jasaǵan jańa startaptary týraly aıtyp berdi. 

Onyń aıtýynsha, byltyr Activation HUB ashylǵan sátten beri 200-den astam ótinim kelip túsken. Al «Qazaqtelekom» startaptardy salalyq máseleler boıynsha qurylymdaýdy bastaǵan.

— Mysaly, Densaýlyq saqtaý mınıstrligi. Biz aýyldyq okrýgterde optıka ornatyp, feldsherlik-akýsherlik pýnktterge ınternet tartyp jatyrmyz, biraq sońynda «ol jerge ınternetti ne úshin tartyp jatyrmyz?» degen suraq qoıamyz. Sondyqtan biz Densaýlyq saqtaý mınıstrligine medıtsınalyq startaptar ótkizýshisine aınaldyq. Mysaly, «Askl» degen joba bar, bul JI-terapevt. Biz ony qazir 30 memlekettik emhanaǵa pılottyq rejımde ornattyq jáne múmkindiginshe barlyq medıtsınalyq uıymǵa ornatqymyz keledi, — dedi Baǵdat Mýsın.

Taǵy bir qyzyqty startap — feldsherlerge arnalǵan vıdeojetondar. Bul medıtsına mamandaryn dóreki naýqastardan qorǵaıdy.

— Bul vıdeojetondy ózimiz jasamadyq. Biz daıyn qurylǵyny satyp aldyq jáne vıdeotaldaý qyzmetin basqa bir kompanııadan aldyq. Osylaısha birlesip, feldsherlerge paıda ákeletin ónim jasadyq. Jedel járdem kelgende olarǵa dórekilik kórsetetin, urysatyn nemese odan da soraqy qol jumsaýǵa tyrysatyn jaǵdaılardy kórip otyrmyz. Biz bul máseleni dál osy startaptarmen seriktestikte sheshemiz, — dedi «Qazaqtelekom» basshysy.

Aıta keteıik, Astanada úshinshi kún qatarynan Digital Bridge 2025 halyqaralyq tehnologııalyq forýmy ótip jatyr.

EKSPO kórmesine salynǵan «Nur álem» pavılonynyń ornynda ALEM.AI alǵashqy JI ortalyǵy ashyldy. Onda Telegram, Presight, ıAndeks kompanııalarynyń JI boıynsha zerthanalary men ókildikteri ashylmaq.