Qazaqstanda JI salasy boıynsha 150 startap bar — Oljas Bektenov
ALMATY. KAZINFORM — Premer-mınıstr Oljas Bektenov elimizde jasandy ıntellektti damytýdyń quqyqtyq bazasy qalaı qalyptasyp jatqanyn aıtty.
Úkimet basshysy «Digital Almaty 2025» tsıfrlyq forýmy barysynda, qazir tek tehnologııalyq ınfraqurylymdy ǵana damytý tıimsiz ekenin jetikizdi. Ony álemdik ozyq tájirıbe kórsetip otyr.
— Ásirese, esepteý qýattaryn eksporttaý erejeleri qatańdatylyp, quny ósip bara jatqanyn eskeretin bolsaq, bul — óte ózekti másele. Mysaly, DeepSeek jáne 01.AI kompanııalarynyń qytaılyq modelderi LLM úlken tildik úlgilerin eń tómen shyǵyndarmen damytýǵa bolatynyn dáleldedi. Bul mundaı tehnologııalardy ázirleý qoljetimdi ekenin kórsetedi. Jergilikti LLM jáne mýltımodaldy modelderge kóshý jasandy ıntellekttiń damýyndaǵy kelesi mańyzdy qadam. Bul tehnologııalar bizdiń mádenı qundylyqtarymyzdy saqtaýǵa, sheshimderdi beıimdeýge jáne derekterdiń qaýipsizdigin arttyrýǵa múmkindik beredi, — dedi ol.
Sondaı-aq Oljas Bektenov elde jasandy ıntellekt komıteti qurylǵanyn tilge tıek etti.
— Biz ózimizde jańa memlekettik organ — Jasandy ıntellekt komıtetin qurdyq. Ulttyq jasandy ıntellekt strategııasyn ázirleýge negiz bolǵan tıisti tujyrymdamany bekittik. Innovatsııalardy damytý úshin quqyqtyq negiz qurýǵa baǵyttalǵan jasandy ıntellekt týraly zań jobasyn ázirledik.
Bul qujat ta jasandy ıntellekt salasyn retteý men damytýdy yntalandyrý arasyndaǵy tepe-teńdikti qamtamasyz etýge tıis. Qazir Prezıdent janyndaǵy jasandy ıntellektti damytý jónindegi keńes qurylyp jatyr, onyń quramyna jetekshi otandyq jáne halyqaralyq sarapshylar kiredi, olar osy saladaǵy ozyq tehnologııalar men tájirıbeni ıntegratsııalaýǵa yqpal etedi, — dep túsindirdi Premer-mınıstr.
Perspektıvaly AI-startaptaryn qoldaý úshin Astana Hub bazasynda maqsatty kólemi 1 mlrd dollar bolatyn Venchýrlik ınvestıtsııalar qory quryldy.
— Tehnologııalyq progress pen ınnovatsııalardyń óńirlik ortalyǵy bolyp tabylatyn Astana Hub jalpy jyldyq kirisi 1 mlrd dollardan astam somany quraıtyn myń jarymnan astam qatysýshyny biriktiredi. Olardyń arasynda jasandy ıntellekt salasyndaǵy Higgsfield AI, Cerebra, CodiPlay, Arlan Biotech, Alaqan sııaqty barlyǵy 150 startap bar. Keıbir startaptardyń quny 100 mln dollarǵa jetip úlgerdi, — dedi ol.
Osyǵan deıin bıyl Qazaqstanda jasandy ıntellektini keńinen qoldanatyn jáne tsıfrlyq tehnologııalardy damytýǵa negizdelgen iri ulttyq ortalyq qurylatyny týraly jazǵan edik.