Qazaqstanda JI quraldary bilim berý salasynda memlekettik qoldaý tapty
ASTANA. KAZINFORM – Qazaqstanda bilim berý salasyna jasandy ıntellekt quraldaryn engizý maqsatynda ulttyq joba iske qosyldy. Bul bastama OpenAI kompanııasymen birlesip júzege asyrylyp jatyr.
Bilim Group baspasóz qyzmetiniń málimetinshe, joba aıasynda 165 myń pedagog arnaıy ázirlengen ChatGPT Edu júıesine qol jetkize alady. Bul bastama bilim berý salasyna jasandy ıntellektini engizý boıynsha memlekettik qoldaýǵa ıe bolǵan iri jobalardyń biri bolyp otyr.
OpenAI ókili Kevın Mıllstiń aıtýynsha, jasandy ıntellekt tehnologııalary bilim berý salasynda ár adamnyń áleýetin arttyrýda mańyzdy ról atqarady. Qazaqstan men OpenAI arasyndaǵy seriktestik pedagogterge paıdaly quraldar usyný arqyly oqýǵa qoljetimdilikti arttyrýǵa jáne JI daǵdylaryn meńgerýdegi alshaqtyqty joıýǵa baǵyttalǵan. Bul qadam bilim berý júıesiniń bolashaǵyna uzaq merzimdi yqpal etedi.
ChatGPT Edu lıtsenzııalary mektepke deıingi uıymdardan bastap, mektepter, kolledjder, joǵary oqý oryndary, ǵylymı-zertteý ınstıtýttary jáne Astana Hub sııaqty uıymdarǵa taratylady. Joba Jasandy ıntellekt jáne tsıfrlyq damý mınıstrligi, Oqý-aǵartý mınıstrligi jáne Ǵylym jáne joǵary bilim mınıstrlikteriniń qatysýymen júzege asyrylyp jatyr. Lıtsenzııalar tegin usynylyp, olardy iske qosý BilimClass platformasy negizinde ázirlengen ai.bilimclass.kz servısi arqyly júrgiziledi.
– ChatGPT Edu – bul tek tehnologııalyq qural ǵana emes, sonymen birge qazaqstandyq pedagogterdiń kásibı damýyna baǵyttalǵan ınvestıtsııa. Jobanyń maqsaty – pedagogterge jasandy ıntellekt múmkindikterin meńgerýge jáne ony kúndelikti jumysta tıimdi paıdalanýǵa jaǵdaı jasaý. Bul tehnologııa pedagogterdiń jumys júktemesin azaıtyp, bilim sapasyn arttyrýǵa yqpal etedi, - deıdi Bilim Group IT holdınginiń bas dırektory Aleksandr Savchenko.
ChatGPT Edu – bilim berý mekemelerine arnalǵan arnaıy ázirlengen ChatGPT nusqasy. Bul júıe oqý oryndaryna jasandy ıntellekttiń ozyq fýnktsııalaryn paıdalanýǵa múmkindik beredi, sondaı-aq derekter qaýipsizdigi men qupııalylyǵyn qamtamasyz etedi. Pedagogter bul quraldy sabaq josparyn qurý, tapsyrmalar men test suraqtaryn daıyndaý, oqý materıaldaryn ár oqýshynyń deńgeıine beıimdeý úshin paıdalana alady. Joba nátıjesinde pedagogterdiń sabaqqa daıyndalýǵa, tapsyrmalardy tekserýge jáne esep berýge ketetin ýaqyty qysqarady.
Eske salsaq, osyǵan deıin habarlaǵanymzaı, jasandy ıntellekt tehnologııalary mektepterdi basqarý tásilderin ózgertedi.
