Qazaqstanda JI kómegimen artyq júk tıeýdiń 2 mıllıonnan astam deregi anyqtaldy
ASTANA. KAZINFORM – Qazaqstanda jasandy ıntellekt kómegimen júk kólikteriniń shamadan tys júk tıeýine qatysty 2 mıllıonnan astam jaǵdaı belgili boldy. Bul týraly Astanada ótip jatqan New Silk Way halyqaralyq forýmynda Kólik vıtse-mınıstri Damır Qojahmetov málimdedi.
Onyń aıtýynsha, Kólik mınıstrligi Presight kompanııasymen birlesip, ulttyq beınebaqylaý júıesin synaqtan ótkizgen. Joba aıasynda elimiz boıynsha kólik quraldarynyń 412 mıllıonǵa jýyq júrisi taldanǵan.
– Biz Presight kompanııasymen birlesip, ulttyq beınebaqylaý júıesiniń pılottyq jobasyn iske asyrdyq. Qazaqstan boıynsha kólik quraldarynyń 412 mıllıonǵa jýyq júrisin óńdep, júk kólikteriniń shamadan tys júk tıeýine qatysty 2 mıllıonnan astam jaǵdaıdy anyqtadyq, – dedi vıtse-mınıstr.
Damır Qojahmetovtiń sózinshe, júıe kólik qozǵalysynyń qarqynyn, júk tasymalynyń baǵyttaryn jáne óńirler arasyndaǵy júk aǵynyn da taldaýǵa múmkindik bergen.
Aıta óteıik, elordada Qazaqstannyń Kólik aptalyǵy aıasynda «NEW SILK WAY» VIII halyqaralyq bıznes-forýmy ótip jatyr. Atalǵan is-shara — kólik-logıstıka salasyn damytýdyń ózekti máselelerin talqylaýǵa, halyqaralyq yntymaqtastyqty nyǵaıtýǵa jáne Eýrazııanyń kólik dálizderiniń tıimdiligin arttyrýǵa arnalǵan negizgi halyqaralyq alańdardyń biri.
Bıyl forým Qazaqstan men 39 ózge memleketterden kelgen ókilderdiń basyn qosty. Іs-sharaǵa memlekettik organdardyń, halyqaralyq uıymdardyń, kólik-logıstıkalyq kompanııalardyń, salalyq birlestikter men sarapshylar qaýymdastyǵynyń 2 000-ǵa jýyq ókili qatysady dep kútilip otyr. Qatysýshylar qatarynda 338 uıymnyń ókilderi bar.
Buǵan deıin Qazaqstan júk tasymalyn JI arqyly basqarýdy josparlap otyrǵany habarlandy.
