Qazaqstanda jetim balalardyń otbasynda tárbıelený múmkindigi artyp keledi — mınıstrlik

ASTANA. KAZINFORM — Qazaqstanda jetim balalardyń otbasynda tárbıelenýine basymdyq berilip otyr. Bul týraly Ortalyq kommýnıkatsııalar qyzmetinde ótken dóńgelek ústel barysynda Oqý-aǵartý vıtse-mınıstri Edil Ospan málimdedi.

— Bizdiń mindetterimizdiń biri — balalarymyzdyń otbasynda ómir súrý jáne tárbıelený quqyǵyn qamtamasyz etý. Balalar ınternat mekemelerin ınstıtýtsıonalsyzdandyrý saıasatyn júrgizý jalǵasyp jatyr, — dedi vıtse-mınıstr.

Onyń aıtýynsha, qazirgi ýaqytta elimizdegi 21 387 jetim balanyń 17 660-y qazaqstandyq otbasylarda tárbıelenip jatyr. Jyl saıyn Qazaqstan azamattary 1000-nan astam jetim balany óz qamqorlyǵyna alady.

2024 jyly elimizde balalar úıine balama retinde «kásibı otbasy ınstıtýty» engizildi. Bul — balalardy arnaıy daıyndyqtan ótken otbasylarǵa ýaqytsha ornalastyrýdy kózdeıtin jańa áleýmettik tetik.

— Júrgizilgen sharalardyń nátıjesinde balalar úıinde tárbıelenetin balalardyń sany sońǵy on jylda eki esege azaıdy, — dedi Edil Ospan.

Sonymen qatar, vıtse-mınıstrdiń aıtýynsha, jetim balalarǵa áleýmettik qoldaý kórsetý jumystary da júıeli túrde júrgizilip jatyr. Atap aıtqanda, elimizdiń barlyq óńirinde balalar úıiniń túlekterine arnalǵan «Meıirim» qaıyrymdylyq aktsııasy júzege asyp jatyr.

— Jetim balalardy turǵyn úımen qamtamasyz etýdiń jańa tetikteri engizildi. Bul sharalar olardyń qoǵamǵa tolyqqandy beıimdelýine jáne ózdiginen ómir súrý daǵdylaryn qalyptastyrýǵa múmkindik beredi, — dedi spıker.

Mınıstrlik málimetinshe, Qazaqstan Respýblıkasy balalardyń quqyqtaryn qorǵaý boıynsha halyqaralyq standarttardy ustanady. Basty maqsat — árbir balanyń múddesin qorǵaý jáne ómir súrý sapasyn arttyrý.

Aıta keteıik, buǵan deıin elimizde balalardyń quqyǵyn qorǵaýǵa baǵyttalǵan jańa ulttyq baǵdarlama ázirlenip jatqanyn jazǵanbyz.