Qazaqstanda jetispeı otyrǵan mamandyqtar anyqtaldy
ASTANA. 13 sáýir. QazAqparat - QR Indýstrııa jáne jańa tehnologııalar mınıstrligine qarasty Jergilikti qamtýdy damytý jónindegi ulttyq agenttigi taý-ken sektorynyń jer qoınaýyn paıdalanýshylarǵa jetispeı otyrǵan mamandyqtardy anyqtady.
Aldaǵy 6 aıdyń ishinde agenttik atalǵan mınıstrliktiń jumys toby quramynda jer qoınaýyn paıdalaný salasyna qajetti joǵary, tehnıkalyq jáne kásibı mamandyqtardyń tizbesin anyqtamaq. Degenmen jer qoınaýyn paıdalanatyn 40 kompanııaǵa júrgizilgen aldyn ala saraptama taý-ken sektoryna jetispeıtin birqatar mamandyqtardy anyqtap otyr. Tizimde geolog mamandyǵy kósh bastap tur. Atap aıtqanda 30 kompanııaǵa geologtar, 21 kompanııaǵa taý-ken ınjeneri, 19 kompanııaǵa marksheıderler, 12 kompanııaǵa avtomattandyrý jáne basqarý salasynyń mamandary, qaýipsizdik tehnıkasy ınjenerleri, ekskavatorshylar qajet. Sonymen qatar elektrslesarlar, elektrenergetıkter, ınjener-tehnologtar da jetispeıdi.
Ulttyq agenttiktiń bastamasyn birqatar mınıstrlikter men vedomstvolar qoldaýda. Endigi ýaqytta quramyna Indýstrııa jáne jańa tehnologııalar, Bilim jáne ǵylym, Eńbek jáne halyqty áleýmettik qorǵaý mınıstrlikteriniń, Jergilikti qamtýdy damytý jónindegi agenttiktiń, Taý-ken óndirý jáne taý-ken metallýrgııasy qaýymdastyǵynyń ókilderi kiretin jumys toby qurylady.
Olar Qazaqstanda jumys isteıtin taý-ken kesheniniń shamamen 190 kompanııasyna saraptama júrgizbek.
