Qazaqstanda jetimder sany azaıdy
ASTANA. QazAqparat - Ata-ana qamqorlyǵynsyz qalǵan 4,5 myń bala óz úıine oraldy. Bul týraly búgin QR BǴM Balalar quqyǵyn qorǵaý komıtetiniń tóraǵasy Nurbek Oıshybekov aıtty, dep habarlaıdy QazAqparat tilshisi.
«Zaman talabyna saı elimizde jyl saıyn balalardyń quqyqtaryn jáne olardyń múddelerin qorǵaıtyn zańnamalyq qujattarǵa ózgerister men tolyqtyrýlar qabyldanýda. 2017 jyly da sondaı ózgerister qabyldandy. Atap aıtsaq, halyqaralyq tájirıbege súıenip, qabyldaýshy jáne qonaq otbasy túsinikteri engizildi. Jetim jáne ata-anasynyń qamqorlyǵynsyz qalǵan balalardyń respýblıkalyq bank derekteri, túsinikteri jáne jumys isteý ustanymdary zańnamalyq aktilerge engizilip, búgingi kúni júzege asyrylýda», - dedi N. Oıshybekov QR Bilim jáne ǵylym mınıstri Erlan Saǵadıevtiń halyqpen eseptik kezdesýi barysynda.
Onyń atap ótýinshe, otbasylyq qurylymnyń mundaı barlyq formasyna memleket tarapynan materıaldyq kepildik beriledi. Sonyń nátıjesinde sońǵy jyldary balalar úıinde tárbıelenýshilerdiń, balalar úıleriniń qatary azaıyp keledi.
«Sońǵy 5 jylda jetim balalarǵa arnalǵan uıymdardaǵy balalardyń sany 40 paıyzǵa, 10 myńnan 6 myńǵa deıin qysqardy. Buǵan qosa, 4,5 myń bala týǵan otbasyna oraldy. Osynyń arqasynda elimizde ata-anasynyń qamqorlyǵynsyz qalǵan balalar men jetimderge arnalǵan 50 mekeme taratylyp, jabyldy», - dedi Nurbek Oıshybekov.
Komıtet basshysynyń dereginshe, elimizde 5 mln 600 myńnan astam bala bar. onyń 3 mıllonnan astam mektep jasynda, bolsa, 2 mıllıonnan astamy mektepke deıingi jastaǵy sábıler.
