Qazaqstanda jetim jáne ata-anasynyń qamqorlyǵynsyz qalǵan 38 386 bala bar
ASTANA. 20 qazan. QazAqparat - Erteń elordada «Qazaqstan Respýblıkasynda áleýmettik jetimdiktiń aldyn alý jáne tómendetý» atty halyqaralyq konferentsııa ótedi.
«Búginde Qazaqstanda jetim jáne ata-anasynyń qamqorlyǵynsyz qalǵan 38 386 bala bar. Jyl saıyn taǵy 8 myńnan astam bala aıqyndalyp keledi. Balalar úılerinde jáne bilim berý júıesiniń basqa uıymdarynda 11 612 bala tárbıe alýda, olardyń tek 2 106 - jetim. Qalǵan 9 506 bala - áleýmettik jetimder. Olardyń ata-analary bas tartqan, ata-analyq quqyqtarynan aırylǵan nemese quqyqtary shektelgen, habarsyz ketken, balalarynyń tárbıesimen aınalyspaıdy», - deıdi Qazaqstannyń SOS Balalar aýyldarynyń ókili Tıhonova Larısa.
Halyqaralyq konferentsııanyń basty maqsaty - Qazaqstandaǵy áleýmettik jetimdikti aldyn alý jáne tómendetý boıynsha memlekettik organdar men ÚEU-lar úshin usynystar men nusqaýlar qurastyrý.
Áleýmettik jetimdiktiń qaýip-qater tobyndaǵy balalar sany týra proportsıonaldy túrde artyp, beıresmı derekter boıynsha elimizde 400 myńnan astam sandy quraıdy.
«Halyqaralyq konferentsııada úkimettik emes uıymdar, QR Parlamenti jáne Úkimeti ókilderinen turatyn, elimizde áleýmettik jetimdikti aldyn alý men tómendetý boıynsha usynystardy oryndaý boıynsha jumys toby qurylady. Shara barysynda úsh taqyryptyq sektsııa jumys isteıdi: «Áleýmettik jetimdikti aldyn alý jáne tómendetý», «Qazaqstandaǵy otbasylyq qurylymnyń alternatıvti formalaryn damytý», «Balalar mekemelerin bitirýshilerdiń áleýmettik adaptatsııasy». Jalpy sessııa barysynda jetim balalar quqyqtary salasyndaǵy ýákiletti organdardyń, QR Parlamenti Májilisiniń depýtattarynyń, balalar quqyqtary salasyndaǵy halyqaralyq uıymdar ókilderiniń negizgi baıandamalary men tanystyrylymdary tyńdalady. Konferentsııa qorytyndysynda usynys-tilekter qalyptastyrylady», - deıdi Qazaqstannyń Azamattyq alıansynyń volonterlik baǵdarlamalar dırektory Vera Kım.
