Qazaqstanda jetim balalarǵa arnalǵan «qonaq otbasy» júıesi engiziledi
ASTANA. QazAqparat - Qazaqstanda jetim balalarǵa arnalǵan «qonaq otbasy» júıesi engiziledi. Búgin QR Parlamenti Senatynyń jalpy otyrysynda senator Birǵanym Áıtimova málim etti. Jıynda «Qazaqstan Respýblıkasynyń keıbir zańnamalyq aktilerine balanyń quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasy talqylanǵan bolatyn.
«Zań jobasy arqyly otbasylyq ornalastyrýdyń jańa nysanyn engizip otyr. Bul qonaq otbasy. Ondaı otbasy balalar úıiniń tárbıelenýshilerin oqý demalysynda, demalys jáne mereke kúnderi qabyldap, olarmen ýaqyt ótkizedi. Qonaq otbasy jetim balalar men ata-anasynyń qamqorlyǵynsyz qalǵan balalar turyp jatqan uıymdar ákimshiligi arasynda jasalatyn shart negizinde júzege asyrylady », - dedi depýtat B. Áıtimova.
Senatordyń aıtýynsha, qazirgi kúni Qazaqstanda qonaq otbasy nysanyn engizýge barlyq jaǵdaılar qalyptasqan. «Qazirdiń ózinde eki myńǵa tarta otbasy osy nysan júıesinde ózderine balalar qabyldap jatyr. Zań jobasynda balalardy otbasyna qabyldaǵandardyń quqyqtary men mindetteri, balalardy belgili ýaqytqa qonaq otbasyna jiberý tetikteri qarastyrylady», - deıdi ol.
Budan bólek, zań jobasy arqyly jetim jáne ata-ana qamqorlyǵynsyz qalǵan balalardy asyrap alý quqyǵy eń birinshi kezekte Qazaqstan azamattaryna, elimizdiń aýmaǵynda jáne odan tysqary jerlerde turyp jatqar týystaryna beriletin bolady. «Osy sanattaǵy azamattardyń balalardy asyrap alýyna múmkindik bolmaǵan jaǵdaıda ǵana Qazaqstannyń balalary sheteldikterdiń asyraýyna beriletin bolady», - dedi B. Áıtimova.
