Qazaqstanda jetim balalardy týystarynyń asyrap alýyna jeńildikter berý qajet

ASTANA. QazAqparat - Qazaqstanda jetim balalardy týystarynyń asyrap alýyna jeńildetilgen rejim engizý qajet. Bul týraly QR Bas prokýrory Ashat Daýylbaev málim etti.

«Ulttyq salt-dástúrdi eskere otyryp, balany jaqyn týystarynyń asyrap alýyna jeńildetilgen rejim engizý qajet. Bul birqatar problemany sheshýge múmkindik beredi, ásirese dástúrli qaǵıdalar kúshti el óńirlerinde barynsha ózekti», - dedi Bas prokýror.

A.Daýylbaevtyń paıymynsha, bala asyrap alý protsedýralaryn jeńildetý asyrap alýshy otbasyndaǵy onyń tálim-tárbıesine ári ómir súrý jaǵdaıyna baqylaý júrgizýdi kúsheıtýdi qajet etedi.

«Osyǵan oraı esep berý týraly zań talaptaryn oryndamaǵany úshin asyrap alýshynyń asyrandy balaǵa qatysty ata-analyq quqyǵyn aıyrýǵa deıingi jaýapkershiligin engizý múmkinshiligin qaraý usynylady», - dedi ol.