Qazaqstanda jetim balalardy baspana kezeginen zańsyz shyǵarý derekteri tekseriledi

ASTANA. QazAqparat – Jetim balalardy baspana kezeginen zańsyz shyǵarý derekteri tekseriledi. Bul týraly QR Indýstrııa jáne ınfraqurylymdyq damý mınıstri Qaıyrbek Óskenbaev aıtty, dep habarlaıdy QazAqparat tilshisi.

«Bul másele boıynsha mindetti túrde tekserý júrgizemiz, elimizde kezeke turý tsıfrlandyrylǵan. Jergilikti atqarýshy organdardyń kezekke qatysty barlyq áreketi qadaǵalanady. Eger sizge osyndaı derekter belgili bolsa, onda osy másele boıynsha tekserý júrgizemiz. Osy oraıda adam kezekten shyqqanda nemese qosylǵanda kúmándi áreketterdi elektrondy júıe arqyly tekserýdi tapsyrdym», - dedi Q. Óskenbaev Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, jyl sońyna deıin atalǵan tizimge qatysty derekter tekseriledi.

«Bul turǵyda zań buzý derekteri anyqtalsa, onda kináliler tıisti jazasyn alady. Jalpy, aýqymdy tekserý júrgizemiz», - dedi mınıstr.

Onyń sózine qaraǵanda, elektrondy formatta kimniń kezekte turǵany kórsetiledi. Eger bireý kezekten zańsyz shyǵarylsa, ony IT mamandary anyqtaı alady.

Budan buryn habarlanǵandaı, Qazaqstanda 61 myń jetim bala baspana kezeginde tur.

Foto: ortcom.kz