Qazaqstanda jetim, asyraýshysynan aıyrylǵan balalardyń Respýblıkalyq málimetter bazasy qurylady
ASTANA. QazAqparat - Búgin Senattyń Áleýmettik-mádenı damý jáne ǵylym komıtetiniń keńeıtilgen otyrysynda «Qazaqstan Respýblıkasynyń keıbir zańnamalyq aktilerine balalar quqyǵyn qorǵaý máseleleri boıynsha ózgerister men tolyqtyrýlar engizý týraly» zań jobasy talqylandy.
Qujatqa birqatar depýtattar bastamashylyq jasaǵan. «Zań jobasy negizinen elimizdegi balalar úıleri men ınternatta tárbıelenýshileriniń sanyn azaıtýdy maqsat etedi. Bul rette jetim jáne asyraýshysynan aıyrylǵan balalardy qazaqstandyq azamattar otbasyna berý joldaryn jetildirý, ondaı sanattaǵy balalar boıynsha málimetter bazasyn qurý, sonymen birge, osy málimetter bazasy arqyly ol balalardyń odan arǵy ómirlerin baqylaý kózdeledi», - dedi zań jobasy boınysha baıandaǵan senator Birǵanym Áıtimova. Onyń aıtýynsha, zań jobasynda jetim nemese asyraýshysynan aıyrylyǵan balalardy otbasylarǵa ornalastyrýdyń jańa túri qonaqtyq otbasy qarastyrylady. Ol boıynsha atalǵan otbasy kelisimsharttar negizinde balalar úıleriniń tárbıelenýshilerin mektep kanıkýldary men merekelik kúnderi qabyldaı alady. Al kanıkýl men mereke kúnderi ýaqytyn osylaı ótkizý balalardyyń jáne qonaqqa qabyldaıtyn otbasynyń kelisimimen júzege asyrylady.
«Mundaı jańa forma asyraýshysynan aıyrylǵan balalardy otbasyna qabyldaý úshin múmkindikter týǵyzyp, aldaǵy ýaqytta olardy asyrap alýǵa, qamqorlyǵyna, patronattyǵyna alýǵa jaǵdaı qalyptastyrady», - dedi senator B. Áıtimova.
Senatorlar ázirlegen zań jobasyna sáıkes, ata-ana qamqorlyǵynsyz qalǵan balalardy Respýblıkalyq málimetter bazasyna mindetti túrde engizý qarastyrylady. Bul júıe bala quqyqtaryn qorǵaý máselelerimen aınalysatyn memlekettik organdar men ortalyq jáne jergilikti deńgeıde, sonymen birge, Qazaqstannyń sheteldik mekemelerimen aqparattar almasýǵa múmkindik beredi. Bundaı málimetter bazasyn qurýǵa 2015-2017 jyldarǵa arnalǵan respýblıkalyq bıýdjetten 280 mıllıon teńge qarastyrylǵan.
