Qazaqstanda jeti jerde avtojol bóligine sý jaıyldy
ASTANA. QazAqparat - Respýblıka aýmaǵyndaǵy tasqyn sý qaýpi bar óńirlerde aldyn alý sharalaryn júrgizý jalǵasyp jatyr, dep habarlaıdy QR ІІM TJ komıtetiniń baspasóz qyzmeti.
QR ІІM TJ komıteti bólimsheleriniń kúshterimen mynadaı is-sharalar júrgizilýde:
- Aqmola, Shyǵys Qazaqstan, Jambyl, Qaraǵandy, Ońtústik Qazaqstan jáne Qostanaı oblystarynda 9700 metr ýaqytsha bógen turǵyzyldy;
- Aqmola, Shyǵys Qazaqstan, Jambyl, Qaraǵandy, Pavlodar, Ońtústik Qazaqstan jáne Qostanaı oblystarynda 46060 dana qum salynǵan qap jınaldy jáne tóseldi;
- Aqmola, Shyǵys Qazaqstan, Qaraǵandy, Qostanaı, Pavlodar, Ońtústik Qazaqstan oblystarynda 313081 tekshe metr tasqyn sý sorǵyzyldy.
11 sáýirdegi jaı-kúı boıynsha Aqmola oblysy Zerendi aýdanynyń Chaglınka aýylynda 4 turǵyn úı jáne 9 jeke úıdiń aýla aýmaqtaryn erigen qar sýy basqan. Sý sorǵytý jumystary júrgizilip jatyr.
Respýblıka boıynsha 7 avtomobıl joldarynyń ýchaskelerinde sý jaıylǵan: Aqmola (3), Qaraǵandy (2), Ońtústik Qazaqstan (1) jáne Soltústik Qazaqstan (1) oblystarynda. Eldi mekenderge qater tónip turǵan joq.
Pavlodar, Qaraǵandy, Aqmola jáne Shyǵys Qazaqstan oblystaryndaǵy 5 ýchaskede avtomobıl joldarynyń shaıylýy oryn aldy. Kólik quraldary aınalma joldar arqyly qozǵalýda.
Apattyq-qutqarý jáne kezek kúttirmeıtin jumystardy júrgizýge bir táýlikte 413 adam, 109 dana tehnıka jáne 26 dana sý sorǵytý qurylǵysy jumyldyryldy.
