Qazaqstanda jeti jylda 536 sport nysany boı kóterdi
ASTANA. KAZINFORM — Buqaralyq jáne balalar-jasóspirimder sportyn damytý memlekettiń basty basymdyqtarynyń biri bolyp qala beredi. Memleket basshysy Qasym-Jomart Toqaevtyń tapsyrmasyna sáıkes óńirlerde sport nysandaryn salýǵa, sonyń ishinde zamanaýı stadıondar men ınklıýzıvti sporttyń mamandandyrylǵan ortalyqtaryn ashýǵa erekshe mán berildi.
Sońǵy jeti jylda Qazaqstanda 536 jańa sport kesheni salyndy. Sonyń nátıjesinde halyqtyń sport nysandarymen qamtylý deńgeıi 44 paıyzdan 59,6 paıyzǵa deıin ósip, 15,6 paıyz artty.
Qazirgi tańda eldegi sport ınfraqurylymy 26 518 nysannan turady: onyń 24 321-i memleket menshiginde, 2 197-si jeke menshikte. Olar ashyq jáne jabyq úlgidegi 20 negizgi qurylys túrin qamtıdy. Stadıondar, dene shynyqtyrý-saýyqtyrý keshenderi, júzý basseınderi men tennıs korttarynan bastap, mamandandyrylǵan eskek esý arnalary, velotrekter men shańǵy bazalaryna deıin bar.
Budan bólek 75 jyldam turǵyzylǵan sport qurylysy iske qosyldy.
Óńirlerdegi sport ınfraqurylymyn damytý úshin jeke ınvestıtsııalar tartýǵa baǵyttalǵan jol kartasy ázirlendi. Jańa nysandardy jobalaý men salý kezinde halyqtyń barlyq sanatyna qolaıly jaǵdaı jasaýǵa múmkindik beretin zamanaýı qoljetimdilik pen ámbebaptyq talaptary negizge alyndy.
Sonymen qatar 2025 jyldan beri qaıtarylǵan aktıvter esebinen quralǵan Arnaıy memlekettik qordyń qarajatyna qurylys júrgizilip keledi. Al bıyl sport nysandaryn salýǵa Infraqurylymdyq damý qorynyń qarajaty baǵyttala bastady.
2019 jyldan bastap elimizde birqatar iri sport nysany boı kóterdi. Olardyń qatarynda J.Úshkempirov atyndaǵy «Jekpe-jek» saraıy, Astanadaǵy «Qazaqstan» jeńil atletıka sport kesheni jáne Qostanaıdaǵy muz aıdyny bar.
Almaty oblysynda Respýblıkalyq olımpıadalyq daıarlyq bazasy paıdalanýǵa berildi. Jańa sport kesheninde ulttyq qurama komandalary men olımpıadalyq rezerv sportshylary jattyǵady.
Jeńil atletıka, aýyr atletıka, voleıbol, basketbol, gandbol, fýtzal, shaıbaly hokkeı, konkı sporty, kórkem gımnastıka, sporttyq gımnastıka, boks, jekpe-jek sporttary, sonyń ishinde kúrestiń barlyq túri, sý sporty, oq atý jáne sadaq atý sııaqty sport túrleriniń damýyna da erekshe serpin berildi.
Qyzylordada 11 myń kórermenge arnalǵan, ÝEFA talaptaryna saı zamanaýı jabyndymen jabdyqtalǵan jańa stadıon ashyldy.
Túrkistanda Muz saraıy, Tennıs ortalyǵy jáne halyqaralyq talaptarǵa saı Eskek esý arnasy paıdalanýǵa berildi. Eskek esý kanaly esý jáne akademııalyq esý sport túrlerin damytýǵa, sondaı-aq týrızmdi órkendetýge jol ashady.
2025 jyly Memleket basshysynyń eldiń barlyq óńirinde ınklıýzıvti sport ortalyqtaryn salý jónindegi tapsyrmasyna sáıkes Aqtóbede «Qýat» ınklıýzıvti sport kesheni ashyldy. Onyń jalpy aýmaǵy 4 855 sharshy metr. Ashyq alańdardaǵy jattyǵýlardy qosa eseptegende, kúnine 500 adamǵa deıin qabyldaı alady. Munda 25 metrlik basseın, ámbebap jáne kúres zaldary, jattyǵý bólmeleri, ústel tennısi zaly, sondaı-aq 200 oryndyq kórermen trıbýnasy ornalasqan. Keshende sporttyń 20-dan astam túrin damytýǵa qajetti jaǵdaı jasalǵan.
Ótken jyly Aqmola oblysynyń Zerendi qalasynda balalar men jasóspirimder sport mektebine arnalǵan jańa sport kesheni paıdalanýǵa berildi. Aýmaǵy 6 myń sharshy metrden asatyn nysan óńirde jańadan salynǵan iri sport keshenderiniń biri sanalady.
Elordada bıyl Ulttyq sport ýnıversıtetiniń qurylysy aıaqtaldy. Ýnıversıtet bilim berý ordasy bolýmen qatar, kópsalaly sport jáne ǵylymı-zertteý ortalyǵy retinde jumys isteıdi. Jańa oqý orny elimizdegi sport ındýstrııasynyń damýyna serpin berip, óńirlik jáne halyqaralyq deńgeıdegi yntymaqtastyqty nyǵaıtýǵa jol ashady.
Buǵan deıin Pavlodarda muz keshenin salýǵa 19,9 mlrd teńge bólingeni habarlanǵan bolatyn.
