Qazaqstanda jeti jylda 3,6 mln adam tabıǵı gazǵa qol jetkizdi
ASTANA. KAZINFORM – Sońǵy jeti jylda Qazaqstanda 772 eldi meken tabıǵı gazǵa qosylyp, gaz paıdalaný múmkindigine ıe turǵyndar sany 9,5 mln-nan 13,1 mln adamǵa deıin ósti.
Energetıka mınıstrliginiń málimetinshe, osy kezeńde eldiń gaz ınfraqurylymyn damytýǵa respýblıkalyq bıýdjet pen «Samuryq-Qazyna» AQ qarajatynan 612,3 mlrd teńge bólindi.
Bólingen qarjy esebinen 821 joba iske asyrylyp, 31 526 shaqyrymnan astam gaz tasymaldaý jelisi salyndy. Nátıjesinde eldi gazdandyrý deńgeıi 51,47%-dan 64,2%-ǵa deıin ósip, 12,73 paıyzdyq tarmaqqa artty.
Gaz ınfraqurylymyn keńeıtý halyqtyń turmys jaǵdaıyn jaqsartýǵa, jańa tutynýshylardy qosýǵa jáne óńirlerde kásipkerlik pen óndiristi damytýǵa qosymsha múmkindik berdi.
2025 jyldyń qorytyndysy boıynsha 94 eldi mekenniń 354 myńnan astam turǵyny tabıǵı gazǵa qol jetkizdi. Sondaı-aq 2 myń shaqyrymǵa jýyq gaz taratý jelisi salyndy.
2026 jyly gaz ınfraqurylymyn damytý jumystary jalǵasyp jatyr. Qazirgi ýaqytta 40 joba júzege asyrylýda. Onyń jeteýi ótken jyldan jalǵasqan joba bolsa, 33-i jańa joba. Josparlanǵan jumystar aıaqtalǵannan keıin taǵy 36 myńǵa jýyq turǵyn tabıǵı gazǵa qol jetkizedi dep kútilýde.
Energetıka mınıstrligi 2035 jylǵa qaraı eldi gazdandyrý deńgeıin 80%-ǵa jetkizýdi josparlap otyr. Osy maqsatta magıstraldyq gaz qubyrlaryn, óńirlik jelilerdi jáne gazdyń resýrstyq bazasyn damytý kózdelgen.
Basym jobalardyń biri – «Esil – Astana» magıstraldyq gaz qubyry. Ony iske asyrý jónindegi memorandýmǵa Qazaqstan Úkimeti men «Gazprom» kompanııasy qol qoıǵan. Joba Astana, Kókshetaý jáne Petropavl qalalaryn turaqty gazben qamtamasyz etýge, sondaı-aq soltústik óńirlerge gaz jetkizý baǵyttaryn ártaraptandyrýǵa múmkindik beredi.
Sonymen qatar «Beıneý – Bozoı – Shymkent» magıstraldyq gaz qubyrynyń ekinshi jelisiniń qurylysy jalǵasýda. Bul joba gaz tasymaldaý júıesiniń ótkizý qabiletin arttyryp, eldiń ońtústik jáne ortalyq óńirlerindegi ósip kele jatqan suranysty qamtamasyz etýge baǵyttalǵan.
2025 jyly uzyndyǵy shamamen 302 shaqyrym bolatyn «Taldyqorǵan – Úsharal» magıstraldyq gaz qubyry paıdalanýǵa berildi. Jańa ınfraqurylym Jetisý oblysyndaǵy 84 eldi mekenge deıin tabıǵı gaz jetkizýge múmkindik beredi.
Almaty, Túrkistan, Qyzylorda, Jambyl, Qostanaı, Qaraǵandy jáne basqa da oblystarda gaz jetkizý jáne taratý jelileriniń qurylysy jalǵasady. Bul jumystar jańa eldi mekenderdi gazǵa qosýǵa, áleýmettik nysandar men kásiporyndardy turaqty energııa kózimen qamtamasyz etýge baǵyttalǵan.
Aıta keteıik, buǵan deıin elimizdiń soltústik jáne ortalyq óńirlerin gazdandyrý jumystaryn keńeıtý josparlanyp otyrǵany habarlanǵan edi. Atap aıtqanda, «Esil – Astana» magıstraldyq gaz qubyry jobasy arqyly soltústik óńirlerdi tabıǵı gazben qamtý múmkindigi artady.
