Qazaqstanda jerlerdi konkýrstyq negizde berýdiń jeke tártibi belgilenedi
«Ózderińizge belgili, 2016 jyly Memleket basshysynyń tapsyrmasyna sáıkes jer salasynda týyndaǵan máselelerdi zerdeleý úshin arnaıy komıssııa jumys istedi. Komıssııa múshelerimen aýyl sharýashylyǵy jerlerin Qazaqstan Respýblıkasynyń jeke jáne zańdy tulǵalaryna jalǵa berý ınstıtýtyn saqtap, ony damytýǵa jáne Jer kodeksine engizilgen moratorııdiń merzimin 5 jylǵa uzartý týraly usynys berilgen bolatyn. Atalǵan usynystardy Memleket Basshysy qoldady. Qyzý qoǵamdyq pikir týǵyzǵan máseleler boıynsha qoldanystaǵy moratorıı merzimi 2021 jyldyń 31 jeltoqsanyna deıin uzartylyp aýyl sharýashylyǵy jerlerin qazaqstandyqtarǵa jeke menshikke jáne sheteldikterge jalǵa berýdi toqtata turatyn ózgerister engizildi», - dedi ol.
Onyń aıtýynsha, moratorıı kezińde aýyl sharýashylyǵy jerleriniń sapaly jaǵdaıy, olardyń paıdalanylýy, menshik ıeleleri men jer paıdalanýshylar týraly málimetter bazasyn qurýǵa baǵyttalǵan revızııa jáne topyraqtyq, geobotanıkalyq zertteý jumystaryn júrgizý kózdelip otyr. Olardyń negizinde topyraqtyq jáne geobotanıkalyq elektrondyq kartalar qurý, eseptik toqsandardyń elektrondy jer-kadastrlyq kartalaryn jasaý qamtamasyz etiledi.
«Atalǵan jumystardy júrgizý úshin 32,8 mlrd tenge qarajat qarastyrylyp otyr. Jer reformasy jónindegi komıssııa jumysynyń qorytyndysy boıynsha mynadaı usynystar qabyldandy: aýyl sharýashylyǵy jerlerin qazaqstandyqtarǵa jalǵa berý ınstıtýtyn saqtaý jáne ony jetildirý, jalǵa beriletin aýyl sharýashylyǵy jerleriniń shekti mólsherin belgileý, shekara mańynan aýyl sharýashylyǵy jerlerin berýge qoıylatyn talaptardy kúsheıtý, halyqqa qajetti jaıylymdyq jerlerdiń kólemin anyqtaý, jeke turǵyn úı qurylysy úshin qajetti jer ýchaskelerin memlekettik muqtajdyqqa jatqyzý», - dedi komıtet basshysynyń orynbasary.
Onyń sózine qaraǵanda, Májiliste qaralyp jatqan «Qazaqstan Respýblıkasynyń keıbir zańnamalyq aktilerine jer qatynastaryn retteý máseleleri boıynsha ózgerister men tolyqtyrýlar engizý týraly» Zań jobasy osy máselelerdi zańnamalyq turǵydan bekitýdi qarastyrady.
«Zań jobasy aýyl sharýashylyǵy jerlerin qazaqstandyqtarǵa jalǵa berý ınstıtýtyn saqtaı otyryp, jerlerdi konkýrstyq negizde berýdiń jeke tártibin belgileýdi kózdeıdi. Kórsetiletin tártippen aýyl sharýashylyǵyn júrgizý úshin jer ýchaskeleri ákimdikpen bekitilgen konkýrsqa qoıylatyn jerler tizbesine sáıkes beriledi. Tizbeni aýdannyń jer qatynastary jónindegi bólimderi qalyptastyryp, mindetti túrde qoǵamdyq keńestermen jáne «Atameken» ulttyq kásipkerler palatasymen kelisilip, aýdannyń atqarýshy organymen bekitedi.
Konkýrstyń aıqyndylyǵyn qamtamasyz etý úshin konkýrstyq komıssııanyń quramyna komıssııa músheleriniń keminde 50 paıyzyn quraıtyn qoǵamdyq keńester men uıymdardyń ókilderin qosý kózdelgen. Bul normalar jer bólý barysynda jergilikti turǵyndardyń qoǵamdyq pikirin eskerý úshin engiziledi. Sonymen birge, konkýrstyń jarııalylyǵy men oǵan barlyq qatysýshylardyń teń qol jetkizýin qamtamasyz etý maqsatynda endi jańa tártip boıynsha konkýrs ótkiziletindigi týraly habarlandyrý buqaralyq aqparat quraldarynda, Aýyl sharýashylyǵy mınıstrligi men ákimdikterdiń resmı ınternet-resýrstarynda ornalastyrylady. Munan bólek atalǵan habarlandyrý ózderiniń resmı saıttary men aqparattyq stendterine ornalastyrý úshin aýdan ákimdikterine jiberiledi», - dedi ol.