Qazaqstanda jergilikti joldardyń 27 myń shaqyrymy jóndeledi

NUR-SULTAN. QazAqparat – QR Indýstrııa jáne ınfraqurylymdyq damý mınıstrliginde mınıstr Beıbit Atamqulovtyń tóraǵalyq etýimen avtomobıl joldary men eldi mekenderdegi kóshelerdiń sapasyna arnalǵan selektorlyq jıyn ótti, dep hababarlaıdy QazAqparat.

QR IIDM málimetinshe, jergilikti mańyzy bar joldardyń jalpy uzyndyǵy – 71 myń shaqyrym, sonyń 25 paıyzy búginde qanaǵattanarlyqsyz jaǵdaıda. 2025 jylǵa deıin jergilikti mańyzy bar joldardyń 27 myń shaqyrymyna jóndeý júrgizý kózdelgen. Bul joldardyń 95 paıyzyn normatıvti jaǵdaıǵa jetkizýge múmkindik beredi.

«Respýblıkalyq buqaralyq aqparat quraldarynda jáne áleýmettik jelilerde qazaqstandyqtardyń jergilikti jelidegi joldardyń sapasyna qatysty jarııalanymdary men pikirleri jıilep ketti. Atalǵan másele mınıstrliktiń jiti baqylaýynda. Osylaısha, QR IIDM Avtomobıl joldary komıteti Jol aktıvteriniń ulttyq sapa ortalyǵy júrgizgen tekseristerdiń nátıjesi boıynsha 2020 jyly respýblıkalyq jelide anyqtalǵan eskertýlerdiń 2 paıyzy túzetilmegen. Jergilikti jeli men eldi meken kósheleri boıynsha bul kórsetkish 25 paıyzdy qurady», - delingen vedomstvo habarlamasynda.

Aıta keteıik, Qazaqstan Respýblıkasyndaǵy jalpyǵa ortaq paıdalanymdaǵy avtomobıl joldary men eldi mekenderdegi kósheler jelisiniń uzyndyǵy 157 myń shaqyrymdy quraıdy:

respýblıkalyq mańyzy bar – 25 myń shaqyrym;

jergilikti mańyzy bar – 71 myń shaqyrym;

kóshe-jol jelisi – 61 myń shaqyrym.

2021 jyly jol-qurylys ári jóndeý jumystarymen respýblıkalyq jáne jergilikti mańyzy bar avtomobıl joldarynyń 6 myń shaqyrymy qamtylady.