Qazaqstanda jergilikti joldardy jóndeýge jyl saıyn 150 mlrd teńge bólinbek
«Elbasy óziniń Joldaýynda osy máselege erekshe mańyz berýdi tapsyrǵan edi. Sońǵy 5-6 jyldyń ishinde respýblıkalyq mańyzy bar joldarǵa qarajat bólindi. Atap aıtqanda, Batys Eýropa - Batys Qytaı joldary, Astanadan Batysqa, Atyraý men Aqtaýǵa, Pavlodarǵa, ary qaraı Semeı men Óskemenge qaraı joldar salynyp jatyr. Byltyr Almatydan Qapshaǵaıǵa, odan ary qaraı Taldyqorǵanǵa jol salyndy. Taldyqorǵannan Óskemenge, ary qaraı Qytaıǵa joldar salý da umyt qaldyrylǵan joq. Onyń nátıjesi - byltyr Qazaqstan arqyly 2,5 mıllıon tonna tranzıttik júk ótti. Ol 2016 jylmen salystyrǵanda 50 paıyzǵa kóp. Ol úlken mańyzdy máseleler», - dedi Jeńis Qasymbek OKQ-da ótken baspasóz máslıhatynda.
Mınıstrdiń aıtýynsha, Memleket basshysy sońǵy Joldaýynda jergilikti mańyzdaǵy joldarǵa basymdyq berýdi tapsyrǵan.
«Onyń sapasy úlken joldarǵa qaraǵanda joǵary emes. Sondyqtan, Elbasy aldaǵy 5-6 jyldyń ishinde sol joldardyń sapasyn kóterip, respýblıkalyq mańyzy bar joldarmen bir deńgeıge kóterýdi júktedi. Jyl saıyn biz ortalyq bıýdjetpen jáne ákimdikterdiń bıýdjetimen birlesip, 60-80 mıllıard teńgedeı bólemiz. Biraq, ol qarajat joldardy ustaý úshin jetkiliksiz. Sondyqtan, Elbasy bul somany eki ese úlkeıtýge tapsyrma berdi. Osy jyldan bastap, atalmysh baǵytqa 150 mıllıard teńgeden bólinetin bolady», - dedi ol.
Jeńis Qasymbek atap ótkendeı, atalǵan qarajattyń 50 paıyzy ortalyq bıýdjetten, 50 paıyzy jergilikti bıýdjetten bólinedi.
«Mysaly, ákimdik 5 mıllıard teńge bólse, biz mindetti túrde 5 mıllıard teńge berýimiz kerek. Sondyqtan, qazirgi tańda myna qarajatty ıgerý úshin «Nur Otan» partııasymen birlesip, osy máseleni baqylaý sharasyn engizemiz. Bul úlken qarajat. Ol tek joldar máselesi emes, kóptegen jumys oryndary da ashylady dep otyrmyz», - dep túıdi mınıstr.