Qazaqstanda jergilikti jerlerde memlekettik veterınarlyq qyzmet qalpyna keltiriledi - QR AShM
ASTANA. 6 mamyr. QazAqparat - Respýblıkanyń aýdan ortalyqtarynda jáne aýyldyq eldi mekenderde dáriger-lıtsenzıattardyń ornyna memlekettik mal dárigerleriniń shtattyq birlikteri qalpyna keltiriledi. Bul týraly Aýyl sharýashylyǵy vıtse-mınıstri Gúlmıra Isaeva málim etti, dep habarlady Primeminister.kz.
«Birneshe jyl buryn veterınarlyq qyzmetti básekege qabiletti ortaǵa berý týraly sheshim qabyldanyp, dáriger-lıtsenzıattar paıda boldy. Taldaý júrgizilip, onyń qate ekenin túsindik - shaǵyn bıznes aýrýlardyń taralýyna jaýapkershilikti óz moınyna ala almaıdy. Búgingi tańda veterınarııadaǵy eń jaqsy keńestik tájirıbeni eske túsirip, oryndarda veterınarlyq qyzmetti qalpyna keltirý týraly sheshim qabyldadyq», - dedi G.Isaeva.
Vıtse-mınıstr túsindirgendeı, aýdan ortalyqtarynda búgin kommýnaldyq memlekettik veterınarlyq kásiporyndar qurylǵan, olarǵa 196 aýdandyq vetstantsııa jáne 2 myńnan astam vetpýnkt tıesili.
«Ár eldi mekende memlekettik mal dárigeri bolady, ol memleketten jalaqy alyp otyrady. Vaktsınatsııany, mal basy sanyn esepke alýdy da, synama irikteýdi de ózi júrgizip, bekitilgen talaptar men standarttarǵa sáıkes qyzmetterdiń barlyq túrlerin oryndaıdy. Memleket óz aldyna ony ustaýǵa qarajat bóledi, arnaıy jabdyqtalǵan avtokólik, bırkalardy skanerleýge arnalǵan apparattar, prınterler, jabdyq, medıtsınalyq preparattar, jeke ǵımarat usynady», - dep túsindirdi vedomstvo basshysynyń orynbasary.
Sońǵy jyldary aýyldyq jerlerde konkýrstyq negizde jeke mal dárigerlerin tartý is-tájirıbesi ózin múlde aqtaǵan joq, óziniń zııandylyǵyn kórsetti - maldyń epızootııalyq saýlyǵy kórsetkishi nasharlady, shalǵaıdaǵy aýyldardyń kóbisi veterınarlyq is-sharalarmen qamtylǵan joq, bólingen qarajat baqylaýsyz jumsaldy, dep aqtaldy Aýyl sharýashylyǵy mınıstrliginiń ókili.
G.Isaevanyń aıtýynsha, qazirgi ýaqytta Qazaqstan HEB-men (Halyqaralyq epızootııalyq bıýro) ózara qatynasy belsendirilip, onyń ádistemesi, qujattamasy, jumys syzbasy negizge alynǵan. Bul ásirese DSU-na kirý aldynda ózekti másele, onda bizge dúnıejúzilik qaýymdastyqqa yqpaldasýǵa, zańnama men standarttardy, onyń ishinde veterınarııany da sáıkestendirýge týra keledi.
«Eger erteńgi kúni aýyl sharýashylyq ónimderin sheteldik naryqtarǵa eksporttaıtyn bolsaq, onda bizdi veterınarııa boıynsha qatań talaptar kútip tur, bul qyzmetti erterek reformalasaq, halyqaralyq uıymdardyń tolyqqandy qatysýshysy bolýǵa jáne ótkizýdiń syrtqy naryqtarynda áleýetti seriktestermen teń dıalog júrgizýge múmkindigimiz artady», - dep esepteıdi AShM basshysynyń orynbasary.
