Túrkistan oblysynda 950 keliden astam esirtki tárkilendi
TÚRKІSTAN. KAZINFORM – Óńirde jyl basynan beri esirtkiniń zańsyz aınalymyna qatysty 294 derek anyqtaldy. Bul týraly Túrkistan oblysy polıtsııa departamenti bastyǵynyń birinshi orynbasary, polıtsııa polkovnıgi Arman Tilenshın málimdedi.
Onyń aıtýynsha, anyqtalǵan derekterdiń 103-i qylmys bolsa, 191-i teris qylyq sanatyna jatady.
– Onyń ishinde esirtki satý boıynsha 18, asa iri kólemde esirtki saqtaý boıynsha 9, esirtki kontrabandasyna qatysty 13 derek anyqtaldy. Sonymen qatar sıntetıkalyq esirtki óndiretin bir zerthananyń qyzmeti toqtatyldy. Arys qalasynda anyqtalǵan jasyryn zerthanadan 1,5 tonna prekýrsor jáne shamamen 480 keli suıyq túrdegi «mefedron» tárkilendi. Jalpy zańsyz aınalymnan 953 keli 145,58 gramm túrli esirtki zaty alyndy, – dedi Arman Tilenshın.
Sonymen qatar qoǵamdyq oryndarda júrgizilgen reıdter barysynda esirtki jáne psıhotroptyq zattardy medıtsınalyq emes maqsatta tutynǵan 330 adam ákimshilik jaýapkershilikke tartyldy. Al «Qarasora-2026» jedel-profılaktıkalyq is-sharasy aıasynda úsh aıda esirtki ósimdikterin zańsyz egýge qatysty 60 derek anyqtaldy. Nátıjesinde 17 974 túp, jalpy salmaǵy 802 keli 932 gramm esirtki ósimdigi joıyldy.
Resmı málimetke sáıkes, óńirde dárilik zattardy bosatý talaptaryn buzǵany úshin 20 ákimshilik hattama toltyrylyp, 4 mln 411 myń 500 teńge kóleminde aıyppul óndirildi. Sondaı-aq «Dármek» jedel-profılaktıkalyq is-sharasy barysynda 28 materıal tirkelip, 26 ákimshilik hattama toltyryldy.
Buǵan deıin Túrkistan oblysynda aýlasyna qarasora ekken turǵyn ustalǵanyn habarlaǵan edik.
