Qazaqstanda jer ýchaskeleri aýktsıon arqyly satylady

NUR-SULTAN. QazAqparat – Elimizde jer ýchaskelerin satyp alýǵa qatysty jańa pılottyq joba engizilip jatyr. Bul týraly «Azamattarǵa arnalǵan úkimet» memlekettik korporatsııasynyń basqarma tóraǵasy Súıenish Ábdildın málim etti, dep habarlaıdy QazAqparat tilshisi.

«Jer ýchaskesin alý protsesin jeńildetý maqsatynda biz kadastrlyq karta ázirledik. Máseleni aldymen qoǵamnyń talqysyna salyp, jurshylyqtyń pikiri eskerildi. Kartada jer ýchaskelerine qatysty barlyq aqparat kórsetilgen. Jyljymaıtyn múliktiń biryńǵaı memlekettik kadastry aıasynda jer ýchaskelerin egov.kz portalynda aýktsıon arqyly usyný pılottyq jobasy iske qosyldy», - deıdi Súıenish Ábdildın Ortalyq kommýnıkatsııalar qyzmetinde ótken baspasóz máslıhatynda.

Basqarma tóraǵasynyń aıtýynsha, pılottyq joba aıasynda alǵashqy jer ýchaskesiniń aýktsıony Aqtóbe qalasynda ótti.

«Aqtóbedegi jer ýchaskesi basynda 51 480 teńgeden bastalyp, aýktsıon nátıjesinde ol jer 6 647 611 teńgege satyldy. ıAǵnı birneshe ese qymbat baǵaǵa satylyp otyr, túsken paıda memleket qazynasyna jiberiledi. Atalǵan pılottyq jobanyń taǵy bir artyqshylyǵy sybaılas jemqorlyq árekettiń aldyn alady. Sonymen qatar qyzmet kórsetý merzimin jarty jyldan 1 aıǵa deıin qysqartýǵa múmkindik beredi. Odan bólek, jer ýchaskesin satýda ashyqtyqty qamtamasyz etpek. Bıyl maýsymda atalǵan jobany elimizdiń barlyq óńirinde engizý josparlanyp otyr», - deıdi korporatsııa basshysy.

Eske sala ketsek, endigi ýaqytta kámelet jasyna tolǵan árbir qazaqstandyq úıden shyqpaı-aq 10 sotyq jerge eGov.kz arqyly ótinim bere alady.