Qazaqstanda jer telimderin onlaın-aýktsıon arqyly satý tártibi ózgerdi
ASTANA. KAZINFORM — QR Aýyl sharýashylyǵy mınıstriniń 2026 jylǵy 7 sáýirdegi buıryǵymen memlekettik múlik tiziliminiń veb-portalynda jer telimderin nemese olardy jalǵa alý quqyǵyn satý jónindegi elektrondyq saýda-sattyqty uıymdastyrý jáne ótkizý qaǵıdalaryna ózgerister engizildi.
Qujatta qoldanylatyn negizgi uǵymdar naqtylanǵan. Atap aıtqanda, jer jáne quqyqtyq kadastr derekterin biriktiretin Jyljymaıtyn múliktiń biryńǵaı memlekettik kadastrynyń tsıfrlyq júıesi engizildi. Sonymen qatar memlekettik qyzmetter men zańnamalyq aqparatqa qol jetkizýge arnalǵan biryńǵaı alań ári memlekettik organdarmen ózara is-qımyl jasaýǵa múmkindik beretin «elektrondyq úkimet» veb-portalynyń túsinigi aıqyndaldy.
Jer telimderin saýda-sattyqqa daıyndaý tártibi de jańartyldy. Endi aýktsıonǵa shyǵarylar aldynda ýákiletti organnyń qyzmetkeri bos jer telimderi týraly málimetterdi engizip, kadastrlyq qun aktisin, sondaı-aq satyp alý-satý nemese jaldaý shartynyń jobasyn elektrondy formatta júkteýge mindetti.
Jer telimderi týraly aqparat óńirlik geoaqparattyq júıeler arqyly qalyptastyrylyp, keıin biryńǵaı memlekettik kadastr júıesine joldanady. Osydan keıin ár ýchaskege aýktsıon ótkizýge qajetti shartty sáıkestendirý nómiri beriledi. Málimetter jarııa kadastrlyq kartada da kórsetiledi.
Saýda-sattyqty ótkizý rásimi de ózgergen. Saýdaǵa shyǵarylatyn jer telimi daıyn bolǵannan keıin portal aýktsıon ótetin kún men ýaqytty, sondaı-aq ótinim qabyldaý mártebesin avtomatty túrde belgileıdi. Bul aqparat kadastrlyq kartada jarııalanady.
Eger memlekettik derekqorlardan málimetter avtomatty túrde júktelmese, qatysýshylar qajetti aqparatty ózderi engizip, rastaıtyn qujattardy qosa usynýy tıis.
Saýda qorytyndysy boıynsha júıe jeńimpazǵa hattama, shart jáne tólem jasaý derekterin jiberedi. Qalǵan qatysýshylarǵa tek hattama joldanady. Eger aýktsıon ótpeı qalsa, jer telimi qaıta saýdaǵa qoıylyp, burynǵy sáıkestendirý nómiri saqtalady, al saýdaǵa jańa nómir beriledi.
Qujatta tehnıkalyq aqaý týyndaǵan kezdegi tártip te aıqyndalǵan. Eger másele qatysýshy tarapynan bolsa, aýktsıon jalǵasa beredi. Al portal jumysynda aqaý shyqsa, saýda keıinge shegerilip, másele joıylǵannan keıin úsh jumys kúni ishinde qaıta jalǵasady. Bul jóninde barlyq qatysýshyǵa habarlanady.
Jeńimpaz júıe avtomatty túrde qalyptastyratyn hattama negizinde anyqtalady. Satyp alý-satý nemese jaldaý sharty elektrondy túrde jasalyp, eki jumys kúni ishinde taraptardyń elektrondyq tsıfrlyq qoltańbasymen bekitiledi.
Jeńimpaz eki jumys kúni ishinde jer qunynyń 50 paıyzyn aldyn ala tólem retinde tóleý qajet. Qalǵan soma 30 kúntizbelik kún ishinde óteledi. Eger tólem kólemi 10 myń aılyq eseptik kórsetkishten aspasa, qarajat «elektrondyq úkimet» arqyly aýdarylady. Al bul somadan asqan jaǵdaıda túbirtek qosa tirkelýi qajet.
Buıryq 2026 jylǵy 11 shildeden bastap kúshine enedi.
Aıta keteıik, buǵan deıin Qazaqstanda jer qoınaýyn geologııalyq zertteý sapasyn baqylaýdyń jańa tártibi engizilgeni habarlanǵan edi.
