Qazaqstanda jer telimin alýǵa 1 mln. 120 myń azamat kezekte tur - Ó. Ózbekov
ASTANA. 20 jeltoqsan. QazAqparat /Jasulan Amanbaıuly/ - Qazaqstanda jer telimin alýǵa 1 mln. 120 myń adam ótinish bildirgen.
Bul týraly búgin Astanada Bnews.kz portalynda bolǵan onlaın konferentsııada QR Jer resýrstaryn basqarý agenttiginiń tóraǵasy Ómirzaq Ózbekov málim etti.
Onyń aıtýynsha, osy baǵyttaǵy jaǵdaıdy zertteý barysynda, jer alýǵa qatysty ótinish túsirgen azamattardyń 95 paıyzdan astamy iri qalalardan, ıaǵnı Almaty men Astana qalalary jáne oblys ortalyqtarynan jer alýǵa nıet bildergendigi anyqtaldy.
«Astana qalasy boıynsha, jer ýchaskesin alýǵa qatysty 80 myńnan astam ótinish kelip tússe, Almaty qalasy boıynsha, azamattardan 131 myńnan astam ótinish túsken. Qazaqstanda jer telimin alýǵa eń kóp ótinish Ońtústik Qazaqstan oblysy boıynsha kelgen, onda 174 myńnan astam azamat jer alýǵa nıet bildirgen»,- dedi Agenttik basshysy.
Alaıda, agenttiktiń aqparatynda kórsetilgenindeı, bıyl Astana men Almatydan birde bir jer telimi berilgen joq. «Sebebi zańnama boıynsha, jeke turǵyn úı salýǵa arnalǵan jer telimderi tek tıisti ınfraqurylym salynǵannan keıin baryp beriledi»,- dep atap kórsetti Ó. Ózbekov.
«Munda eki túıtkil bar. Azamattar iri qalalarda turǵylary keledi. Degenmen ınfraqurylymy bar jer resýrstary óte az. Soǵan baılanysty qalalyq aýmaqtardan jer bólý isine birshama shek qoıylǵan. Al aýyldyq jerlerden bir telim jer alý eshqandaı qıyndyq týǵyzbaıdy»,-deıdi ol.
Onyń aıtýynsha, jalpy 2005 jyldan beri Astanada 1 447 jer telimi berilgen. Al Almaty qalasynda 24 857 jer bólingen. 2005 jyldan beri Qazaqstan boıynsha, 315 myńnan astam ótinish qanaǵattandyrylǵan.
Elimizdiń Jer resýrstary týraly zańnamalaryna sáıkes, Qazaqstannyń kámelettik jasyndaǵy árbir azamaty 10 sotyq jerdi tegin alýǵa quqyǵy bar.
