Qazaqstanda jer satylady: Qytaı saıtyndaǵy bul habarlandyrý arandatýshylyq bolýy múmkin - Smadııarov

ASTANA. QazAqparat – Qytaı saıttaryndaǵy «Qazaqstanda jer satylady» degen jarnama arandatýshylyq bolýy múmkin. Bul týraly Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«Iá, bul jarnamany biz de kórdik. Qytaı tarapyna, Beıjińdegi Elshimiz sol eldiń Syrtqy ister mınıstrligine jedel jetkizdi. Biz de Qytaı Elshiligine habarladyq. Bul habarlama bizdiń «OLH» sııaqty saıtynda jarııalanǵan eken. Moderatsııadan qalaı ótkenin bilmedim. Sony qazir qytaı tarapy tekserip, bolashaqta mundaı jaıtty boldyrmaýǵa kelisim berdi», - dedi Aıbek Smadııarov vedomstvoda ótken aptalyq brıfıng barysynda BAQ ókilderiniń saýalyna oraı.

Sonymen qatar, resmı ókil bul aqparattyń jalǵan ekenin basa aıtty.

«Telefonmen habarlasyp kórdik. Eshkim almaıdy, telefon sóndirýli. Ózińiz aıtqandaı provakatsııa da bolýy múmkin», - deıdi ol.