«Jer saǵaty» aktsııasyna bıyl elimiz boıynsha 500-den astam nysan qatysty
ASTANA.KAZINFORM - Búgin búkil el boıynsha «Jer Saǵaty» halyqaralyq ekologııalyq aktsııasy ótip jatyr. 2026 jyly aktsııanyń taqyryby elimizde ekotýrızmniń damýy bolyp jarııalandy, dep habarlaıdy QR Ekologııa mınıstrliginiń baspasóz qyzmeti.
Baspasóz qyzmetiniń málimetterine qaraǵanda, jergilikti ýaqyt boıynsha saǵat 20:30-da búkil eldegi úılerde, keńselerde jáne kóshelerde ǵımarattardyń jaryqtandyrýy bir saǵatqa sóndi.
Esterińizge sala keteıik, «Jer saǵaty» aktsııasy – Dúnıejúzilik jabaıy tabıǵat qorynyń (budan ári-WWF) qamqorlyǵymen ótkiziletin jyl saıynǵy halyqaralyq oqıǵa. Aktsııa barysynda WWF planetanyń bolashaǵyna beı-jaı qaramaı, jaryq pen turmystyq elektr quraldaryn bir saǵatqa óshirýge shaqyrady; sonymen birge álemdegi eń tanymal ǵımarattar men eskertkishterdiń jaryqtary sónedi.
Qazaqstan bul sharaǵa 17-shi ret qosylyp otyr jáne bıylǵy jyly sharaǵa elimiz boıynsha 500-den astam nysan: Aqorda rezıdentsııasy, «Báıterek» monýmenti, Táýelsizdik saraıy, «Áziret Sultan» meshiti, sport nysandary, oqý oryndary, óndiristik mekemeler jáne t.b. ǵımarattar qosyldy.
«Jer saǵaty» - bul planetadaǵy eń iri ekologııalyq naýqan. Oǵan dúnıe júzinde 2 mıllıardtan astam adam qatysady, 180 eldegi 7000 qalanyń turǵyndary sharaǵa qosyldy. 2026 jyly «Jer saǵaty» halyqaralyq aktsııasy 19-shy ret ótkizildi.
Іs-sharanyń maqsaty - tabıǵat pen planeta resýrstaryna jaýapkershilikpen qaraý qajettiligine nazar aýdarý.
Osyǵan deıin elordada ótetin Óńirlik ekologııalyq sammıtinde Astana deklaratsııasy qabyldanǵany týraly jazdyq.