Qazaqstanda jer qoınaýyn paıdalanýdyń jańa tártibi qarastyrylyp otyr
ASTANA. QazAqparat - Búgin Úkimet otyrysynda Qazaqstan Respýblıkasynyń «Jer qoınaýy jáne jer qoınaýyn paıdalaný týraly» Kodeksi jobasynyń tanystyrylymy boldy, dep habarlaıdy QazAqparat.
Kodeks jobasyn tanystyrǵan QR Investıtsııalar jáne damý Birinshi vıtse-mınıstri Alık Aıdarbaev atap ótkendeı, qazirgi ýaqytta óndirý qarqyny mıneraldy-shıkizat qorynyń ornyn toltyrý qarqynynan ozyq keledi.
«Qazaqstanda geologııalyq barlaýǵa quıylatyn ınvestıtsııa kóleminiń azdyǵy baıqalýda. Qazirgi kezde ortasha 1 sharshy metr aýmaqqa shamamen 7 dollardan keledi. Al bul kórsetkish AQSh-ta - 87, Avstralııada - 167, Kanadada - 203 dollarǵa jetedi. Geologııalyq barlaýǵa keletin ınvestıtsııalardyń deńgeıi tómen bolǵandyqtan, jańa ken oryndaryn ashý kesheýildeýde. Elimizdiń ekonomıkasyn turaqty damytý úshin mıneraldy-shıkizat bazalarynyń ornyn toltyrýdy qamtamasyz etý qajet, qosymsha jumys oryndaryn ashý, jańa ken oryndaryn ashý jáne jeke aýmaqtardy damytý basty nazarda bolýy tıis», - dedi Alık Aıdarbaev.
Belgili bolǵandaı, Kodeks jobasy jer qoınaýyn paıdalanýda ekologııalyq jáne ónerkásip qaýipsizdikteri boıynsha talaptardy kúsheıtýdi kózdeıdi.
Onyń aıtýynsha, jobada «birinshi keldi -birinshi alady» prıntsıpine aýysý kózdelgen. Osy prıntsıp sheńberinde barlyq paıdaly qazbalar túrleri boıynsha jer qoınaýy ýchaskelerin tıimdi basqarýdy qamtamasyz etý úshin Qatty paıdaly qazbalardy barlaý men óndirýge lıtsenzııalar jáne baǵdarlamalar engiziledi.
«Óndirý boıynsha jer qoınaýyn paıdalaný quqyǵyn berýde avstralııalyq úlgige ótý usynylady. Ken oryndary úshin óndirý merzimi uzartý múmkindigin qosqanda 25 jyldy quraıdy», - dep atap ótti birinshi vıtse-mınıstr.
Aıdarbaevtyń sózine qaraǵanda, ǵylymı zertteý tájirıbelik-konstrýktorlyq jumystarǵa arnalǵan shyǵyndar, kadrlardy oqytý, belgilengen jaldamalyq aqyny tóleý, belgilengen mınımaldy shyǵyndardy oryndaý úshin jer qoınaýyn paıdalanýshylardyń mindettemeleri bekitiledi.
Jer qoınaýyn paıdalaný salasynda ıelikten shyǵarý nemese baqylaýdy aýystyrýǵa qatysty ruqsat berý tártibi saqtalady.
