Qazaqstanda jer qoınaýyn paıdalaný quqyǵyn usyný jeńildetiledi
ASTANA. QazAqparat - «Jer qoınaýy men jer qoınaýyn padalaný týraly» QR Kodeksi tujyrymdamasynyń jobasynda jer qoınaýyn paıdalaný quqyǵyn usynýdy jeńildetý boıynsha norma qarastyryldy.
Bul týraly búgin Astanada atalǵan Kodeks tujyrymdamasynyń jobasyn talqylaýǵa arnalǵan «dóńgelek ústelde» QR Investıtsııalar jáne damý vıtse-mınıstri Albert Raý málim etti.
«Tujyrymdama qandaı maqsatty kózdep otyr?» degen máselege toqtalatyn bolsaq, onda jer qoınaýyn paıdalaný quqyǵyn usyný qalaı jeńildeıtini kórsetiledi, sondaı-aq ınvestıtsııalardy tartý úshin jaǵdaı jasaý, ıaǵnı bárinen buryn ken ornyn geologııalyq zertteý, barlaý jáne paıdaly qazbalardy óndirýde jaǵdaı jasaý máseleleri atap kórsetiledi»,-dedi A. Raý.
Osyǵan baılanysty taý-ken salasynda jer qoınaýyn paıdalanýdy retteýdi avstralııalyq ádis boıynsha jetildirý usynylady.
«Bıyl biz ony qanatqaqty nusqada bastamaqpyz. Kodekste jer qoınaýyn paıdalanýdy barlaý quqyǵy úsh kúnniń ishinde usynylady»,-dedi vıtse-mınıstr.
Bul turǵyda aýqymdy uıymdastyrý-tehnıkalyq jumystar eskerilgenine toqtalǵan ol, «osy oraıda ınteraktıvti karta arqyly ashyq qoljetimdilikti usyný qamtylǵan. Ony qurý kerek, ıaǵnı barsha kesteni ınteraktıvti rejimde ornalastyrý qajet. Shyn máninde bul eleýli jumysty qajet etedi, biraq ol ózin-ózi aqtaıdy. Sebebi, jer qoınaýyn paıdalanýshy erkin rejimde jalǵa alý ustanymy boıynsha ýchaskelerdi barlaýǵa alý múmkindigine ıe bolady», - dedi.
A. Raýdyń aıtýynsha, taǵy bir másele geologııalyq aqparatty qupııasyz etýge qatysty. «Kóp jyldan berý alańdatyp kelgen ekinshi másele ol qupııasyz etýge baılanysty. Búginde qorlarda 132 myń esepter qamtylǵan, onyń ishinde 34 myń esep qupııalanǵan», - dedi mınıstrdiń orynbasary.
