Qazaqstanda jer qoınaýyn ıgerý zańnamasy qalaı ózgeredi
ASTANA. QazAqparat - Búginde "Jer qoınaýy men jer qoınaýyn paıdalaný týraly" kodeksi ázirlendi. QR Energetıka vıtse-mınıstri Maxambet Dosmuxambetovtiń aıtýynsha, atalǵan qujat aıasynda jer qoınaýyn paıdalanýǵa ruqsat berý júıesin jeńildetý qarastyrylǵan.
Sonyń arqasynda ákimshilik kedergilerdi barynsha azaıtyp, geologııalyq barlaý qyzmetine qarjy kóptep quıylady degen jospar bar, dep xabarlaıdy QazAqparat tilshisi.
"Jer qoınaýyn paıdalanýǵa ruqsat berý máselesine keler bolsaq, Kodeks boıynsha ondaı ruqsattar aýktsıon arqyly beriledi. Sosyn Kaspıı qaırańynda isteımin degen kompanııalardyń tólem qabilettigi men jumys tájirıbesine naqty talaptar qoıylady. Budan bólek, kelisimshart júıesi bolady. Oǵan lıtsenzııa alýdyń qajeti joq. Kelisimsharttyń eki túri bolady. Ol - "barlaý men óndirý" jáne "óndirý". Buran tek "barlaý" men "óndirý" ǵana bolatyn. Endi, ol eki qyzmetti bir kelisimshartpen alýǵa bolady. Bylaısha aıtqanda, kompanııa barlaý kezinde shıkizat qoryn tapsa, birden óndirýge kóshe alady. Áıtpese, buryn "óndirýge" bólek kelisimshart jasalatyn edi", - dedi Dosmuxambetov búgin kodeksti talqylaýǵa arnalǵan jıynda.
Vıtse-mınıstrdiń sózine qaraǵanda, barlyq kelisimsharttar tıptik úlgide rásimdeledi jáne ol qujatqa eshqandaı saraptama jasalmaıdy. Al jobalyq-smetalyq qujattar bólek ázirlenedi. Buryn ol qujattardy kelisimshartqa deıin daıarlaý mindeti bolǵan. Sosyn oǵan eki jyldaı ýaqyt ketetin. Endi, aldymen kelisimshart jasalady da, artynan jobalyq-smetalyq qujattar tapsyrylady.
Budan bólek, munaı-gaz qory boıynsha esep berýdiń xalyqaralyq standarty bolady. Alaıda atalǵan talap birden engizilmeıdi. 2025 jylǵa deıin ótpeli kezeń qarastyrylǵan. Sodan bastap xalyqaralyq standart tolyǵymen iske asatyn bolady. Jalpy, kodeks aıasyndaǵy sharalar munaı-gaz salasyna ınvestıtsııalardy kóptep tartýdy kózdeıdi.
