Qazaqstanda jer bankin qurý usynyldy
ASTANA. QazAqparat - Qazaqstanda jer bankin qurý usynyldy. Mundaı bastamany tabıǵatty qorǵaý zańnamasy jónindegi táýelsiz sarapshy Aleksandr Mıroshnıchenko kóterdi.
«Jer bankterin qurý qajet. Sonda kepildik jáne saqtandyrý aýdıtteri jerdi tıimdi paıdalanýǵa túrtki bolady. Atalmysh rásimder barysynda jerdiń ekologııalyq jaǵdaıy men topyraǵynyń sapasy baǵalanady», - dedi QR Parlamenti depýtattary men halyqaralyq jáne úkimettik emes uıymdardyń qyzmetkerlerine arnalǵan «Jasyl» ekonomıka salasyndaǵy zańnamalyq aktilerdi jetildirý» taqyrybynda ótken semınar-trenıngte A. Mıroshnıchenko.
«Bul óte qajetti element. Budan buryn baǵalaý jumystaryn «gıprozem» júrgizgen, buǵan mıllıondaǵan dollar jumsaldy, óıtkeni jer 100 paıyz memleketke tıesili bolatyn. Qazir jaǵdaı múldem basqa, adamdardy osylaı jerdi baǵalaýǵa májbúrleıtin qandaı da bir ekonomıkalyq tetik kerek. Aýdıt rásimin júrgizetin jer bankteri osy jumysty atqarar edi», - dep túıindedi sózin A.Mıroshnıchenko.
