Qazaqstanda jeńildetilgen ıpotekanyń úlesi 85%-ǵa jetti
ALMATY. KAZINFORM – 2026 jyldyń birinshi toqsanynyń qorytyndysy boıynsha Qazaqstanda berilgen jańa ıpotekalyq qaryzdardyń kólemi 438 mıllıard teńgege jetti. Bul ótken jylmen salystyrǵanda 12,3%-ǵa kóp.
Qazaqstan qarjygerler qaýymdastyǵy málimetine sáıkes, naryqtyń ósimine negizinen jeńildetilgen ıpoteka kóleminiń ulǵaıýy áser etken.
— Jańadan berilgen nesıelerdiń jalpy ósimin tolyqtaı «Otbasy bank» qamtamasyz etti. Bank nesıe berý kólemin ótken jylmen salystyrǵanda 54,3%-ǵa arttyryp, 347,5 mıllıard teńgege jetkizgen. Memlekettik baǵdarlamalar aýqymynyń keńeıýi naryqtyq ıpotekaǵa teris áser etken faktorlardyń zardabyn joıýǵa múmkindik berdi. Máselen, qazirgi tańda bankterdiń qymbat qorlary, joǵary bazalyq mólsherleme men retteýshilik shekteýler saldarynan qarapaıym naryqtyq sharttarmen beriletin ıpoteka kólemi 53,6%-ǵa qysqardy, — dedi sarapshylar.
Osy úrdis aıasynda memlekettik baǵdarlamalardyń naryqtaǵy mańyzy burynǵydan da kúsheıe túsken. Eger bir jyl buryn jańadan berilgen nesıelerdiń 73,9%-y jeńildetilgen ıpotekaǵa tıesili bolsa, búginde bul kórsetkish 85,1%-ǵa jetken. Óz kezeginde ekinshi deńgeıli bankterdiń ıpoteka naryǵyndaǵy úlesi 14,9%-ǵa deıin qysqardy.
Sonymen qatar elde ıpotekaǵa degen suranys birtindep báseńdep keledi. Bankterge túsken ótinimder sany 20,7%-ǵa azaıyp, 192 myń bolǵan — bul sońǵy eki jyldaǵy eń tómengi kórsetkish.
Sarapshylardyń pikirinshe, bul kórsetkishke turǵyn úı baǵasynyń ósýi, halyqtyń naqty tabysynyń qysqarýy, sondaı-aq zeınetaqy jınaqtaryn paıdalaný jolynyń qıyndaýy áser etken.
Odan bólek naryqtyń qurylymy da ózgerip keledi. Kólemi úlken ıpotekalyq nesıelerdiń úlesi artyp keledi. Máselen, somasy 20 mıllıon teńgeden asatyn qaryzdardyń úlesi 30%-dan 37%-ǵa ósse, 10 mıllıon teńgege deıingi shaǵyn nesıelerdiń úlesi 22%-dan 17%-ǵa deıin azaıǵan.
Eske salaıyq, 2027 jylǵa deıin ıpotekalyq turǵyn úı qaryzdary boıynsha jyldyq tıimdi syıaqy mólsherlemesiniń shekti mólsheri ózgerissiz qalady.
