Qazaqstanda jeńildetilgen nesıemen kólik alýǵa ótinishter qabyldaýdyń ekinshi kezeńi bastaldy
ÓSKEMEN. QazAqparat - «BIPEK AVTO - AZIıA AVTO» fılıaldary ekinshi transh boıynsha kólik alýǵa jeńildetilgen nesıeni rásimdeýge ótinishterdi qabyldaı bastady, dep habarlady kompanııadan.
QR Úkimeti Qazaqstanda qurastyrylǵan kólikterdi satyp alýshylarǵa jeńildetilgen nesıe berýdi qarjylandyrý úshin qosymsha 11 mlrd. teńge qarjy bólý sheshimin qabyldady.
«AZIıA AVTO» AQ zaýytynyń ónimin satyp alýshylar úshin bólingen qarajattyń 50% nemese 5,5 mlrd teńge bekitildi.
Memlekettik baǵdarlama aıasynda qazaqstandyqtar «AZIıA AVTO» zaýyty qurastyratyn 22 modelge qol jetkize alady. Onyń quny 2,13 mln teńgeden bastalady.
Óskemende shyǵarylatyn kólikterdi satyp alýshylar úshin aı saıynǵy eń tómengi tólem 31,4 myń teńgeni quraıdy.
Baǵdarlamanyń jańa talaptaryna sáıkes, satyp alatyn kóliktiń eń joǵary baǵasy 9 mln. teńgege deıin kóterildi.
Baǵdarlamanyń qalǵan sharttary ózgerissiz qaldy. Nomınaldyq syıaqy mólsherlemesi 4 paıyz, nesıeniń tıimdi mólsherlemesi (qosymsha shyǵyndardy, saqtandyrýdy qosqanda) 7,5 paıyzdan aspaýy tıis. Nesıelendirý merzimi - 5 jyldan aspaıdy, aldyn ala tólem - 0-20%, borysh valıýtasy - teńge.
Buryn habarlanǵandaı, kólikterdi satyp alýshylarǵa jeńildetilgen nesıe berý aǵymdaǵy jyly 20 sáýirde bastaldy.
