Qazaqstanda jeńildetilgen nesıe berý múmkindikteri keńeıtilýde - Úkimet
««Bıznestiń jol kartasy-2025» jáne «Qarapaıym zattar ekonomıkasy» baǵdarlamalary boıynsha kásipkerler úshin qaryz qarajatynyń sońǵy quny qazir endi 6%-dy quraıdy. «Bıznestiń jol kartasy-2025» baǵdarlamasy boıynsha nesıe kólemi 7 mlrd teńgege deıin ulǵaıtyldy. Sýbsıdııalaý merzimi 5 jyldy quraıdy. «Qarapaıym zattar ekonomıkasy» boıynsha nesıe somasy shektelmeıdi. Al sýbsıdııalaý merzimi 10 jyl», - dedi Ulttyq ekonomıka mınıstri Rýslan Dálenov Úkimet otyrysynda.
Onyń aıtýynsha kepildik berý quraly jaqsartylǵan. «Bıznestiń jol kartasy-2025» baǵdarlamasy boıynsha kepildikter qaryz somasynyń 85%-yn quraýy múmkin. «Qarapaıym zattar ekonomıkasy» boıynsha kepildik nesıe somasynyń 50%-dy quraıdy.
««Bıznestiń jol kartasy-2025» baǵdarlamasy aıasynda salalyq shekteýler alynyp tastaldy. Bul shaǵyn jáne orta bızneske qyzmet túrine qaramastan baǵdarlamaǵa qatysýshy bolýǵa jáne jeńildetilgen qarjy alýǵa múmkindik beredi. «Qarapaıym zattar ekonomıkasy» baǵdarlamasy boıynsha taýarlar men qyzmetter tizimi aıtarlyqtaı keńeıtildi. Osy baǵdarlama boıynsha nesıeleýdiń jalpy kólemi 1 trln teńgege deıin ulǵaıdy», - dedi ol.
Rýslan Dálenov sonymen qatar Ulttyq bank shaǵyn jáne orta bızneske, onyń ishinde jeke kásipkerlerge salalyq shekteýsiz jeńildetilgen nesıe berý baǵdarlamasyn iske qosqanyn aıtyp ótti.
«Nesıe aınalym qarajatty tolyqtyrýǵa 1 jylǵa 8%-ben beriledi. Bul baǵdarlamaǵa 600 mlrd teńge bólinedi. Jalpy, nesıeleýdi ulǵaıtý úshin kóptegen shekteýler alyndy. Tetikter jeńildetilip, qarajat kólemi ulǵaıtyldy», - deıdi Ulttyq ekonomıka mınıstri.
