Qazaqstanda jemqorlyq faktileri kóbeıip barady – agenttik
«2017-2019 jyldary jáne 2020 jyldyń alǵashqy bes aıynda sybaılas jemqorlyqqa qarsy is-qımyl agenttiginiń qyzmetkerleri para berýge qatysty myńǵa tarta qylmysty tirkedi. Sonymen birge keıingi úsh jyldaǵy dınamıka para berýshilerge qatysty faktilerdiń óskenin kórsetip otyr. Máselen bul baǵytta 2017 jyly 255, 2018 jyly 232, 2019 jyly 342 qylmys anyqtalsa, al 2020 jyldyń alǵashqy bes aıynda 172 qylmys tirkelgen. Endi statıstıkany salystyra berińiz: 2018 jyly para berýshilerge qatysty 232 qylmys tirkelse, bir jyldan keıin bul qylmys sany 342-ge deıin artqan», - dedi Danııar Bekaıdarov agenttiktiń búgingi «Antıkor LIVE» aıdarynda.
Osy aralyqta Qazaqstanda para bergeni úshin 586 adam sottalypty. Olardyń 154-i bas bostandyǵynan aıyrylsa, 377-i aıyppul arqalaǵan. Taǵy 67 adamnyń bas bostandyǵy shektelgen.
«Bıyl para úshin qylmystyq jaýapkershilikke tartylǵan azamattardyń besten biri, ıaǵnı 20 paıyzy memlekettik qyzmetkerlerdiń ózi. Olar sottalýdan bólek memlekettik qyzmetten bosatylǵan jáne memlekettik qyzmette ómir boıy jumys isteý quqyǵynan aırylǵan azamattar. Taldaý jumystary kórsetip otyrǵandaı para berýshilerdiń kóbi – jeke kompanııalardyń ókilderi. Olar laýazymdy adamdardy satyp alý arqyly óz kásibin júrgizgisi keledi, memlekettik satyp alý boıynsha atqarylǵan jumysqa qol qoıý úshin osyndaı iske barady», - dedi ol.
Danııar Bekaıdarov sózin naqty mysaldarmen shegeleı tústi. Onyń aıtýynsha, Almatyda JShS ókilderiniń birine qatysty qylmystyq is qozǵalǵan. Ol kelisimge sáıkes somanyń bes paıyzyn (33 mln teńge) Qarasaı aýdany ákiminiń orynbasaryna bergen. Aqshany jalpy qamqorlyq úshin usynǵan.
«Osyǵan uqsas qylmys boıynsha elordada «Aqjaıyq Elektro» JShS dırektory jazalanyp, oǵan 71 040 000 teńge aıyppul salyndy. Ol Almaty aýdany ákiminiń burynǵy orynbasaryna (3 jylǵa bas bostandyǵynan aıyrylǵan) jalpy qamqorlyǵy men oryndalǵan jumys boıynsha jumys aktisine qol qoıyp berýi úshin 5 mln teńge para bergen», - deıdi Danııar Bekaıdarov.