Qazaqstanda jemqorlyq jaıly habarlaǵandar 13 mln teńgege deıin syıaqy alady
Ótken jyly 134 qazaqstandyq sybaılas jemqorlyq týraly habarlaǵany úshin syıaqy aldy, onyń tórteýi - Mańǵystaý oblysynyń turǵyndary. Belsendi azamattyq ustanymy úshin olarǵa 800 myń teńgeden astam qarjy tólengenıly. Bul týraly Sybaılas jemqorlyqqa qarsy is-qımyl komıssııasynyń otyrysynda belgili boldy, dep habarlaıdy QazAqparat Mańǵystaý oblysy ákiminiń baspasóz qyzmetine silteme jasap.
Mańǵystaý oblysy sybaılas jemqorlyqqa qarsy is-qımyl agenttigi departamenti basshysynyń birinshi orynbasary Birjan Haırýllınnyń aıtýynsha, Mańǵystaýda sybaılas jemqorlyqqa qarsy mádenıetti qalyptastyrý úshin 700-den astam aqparattyq túsindirý sharalary ótkizilgen.
Úsh memlekettik organ qyzmetiniń sybaılas jemqorlyq táýekelderine taldaý júrgizilip, nátıjesinde mamandar 98 usynym ázirlegen.
Sondaı-aq, sybaılas jemqorlyqqa qarsy 13 monıtorıng ótkizilgen. Sonyń negizinde 49 usynys ázirlenip, olar memlekettik organdarǵa sátti engizilgen.
Respýblıka boıynsha 7 983 normatıvtik quqyqtyq aktiniń jobasy sybaılas jemqorlyqqa qarsy saraptamadan ótip, 17 170 táýekel anyqtalǵan.
Aıaqtalǵan sotqa deıingi tergeý boıynsha ótelgen zalaldyń jalpy somasy — 108 mlrd teńge.
Agenttik sondaı-aq jalpy somasy 653 mlrd teńgege múliktik aktıvter men aqshalaı qarajatty qaıtarǵan.
2023 jylǵy 15 qyrkúıekten bastap Qazaqstanda sybaılas jemqorlyq faktileri týraly habarlaǵan nemese sybaılas jemqorlyqqa qarsy is-qımylǵa járdemdesken adamdardy yntalandyrý qaǵıdasy kúshine endi.
Qujatqa sáıkes, bopsalaý faktisi týraly habarlaǵandarǵa beriletin yntalandyrý qarjysynyń kólemi memleketke keltirilýi múmkin bolǵan zalaldyń jalpy somasyna baılanysty anyqtalady.
Sybaılas jemqorlyq týraly ákimshilik is júrgizilse, tólem somasy — 30 AEK. Eger qylmystyq is ashylatyn bolsa, yntalandyrý kólemi — qylmystyń aýyrlyǵyna baılanysty 40-tan 100 AEK-ke deıin.
Eger paranyń nemese kelgen zalaldyń mólsheri 1000 AEK-ten assa, onda birjolǵy aqshalaı syıaqy — somanyń 10%-yn quraıdy, biraq 4000 AEK-ten aspaıdy.
Sybaılas jemqorlyq faktisi týraly 1424 nómirine habarlaýǵa bolady.
