Qazaqstanda jemqorlardan tárkilengen qarjyǵa 43 mektep salyndy
2023 jyldyń qorytyndysy boıynsha jemqorlardan tárkilengen qarajyǵa salynǵan 43 mektep ashyldy, dep habarlaıdy Kazinform.
Oqý-aǵartý mınıstrliginiń málimetinshe, osylaısha, elimizde úsh apatty jáne 13 úsh aýysymdy mektep máselesi sheshilgen.
«Óńirlerde jańa bilim berý nysandaryn iske qosý nátıjesinde taǵy 54,4 myń jańa oqýshy orny paıdalanýǵa berildi. Atap aıtsaq, Almaty jáne Túrkistan oblystarynda — 8 mektepten, al elordada — 10 mektep», — dep jazdy vedomstvodan.
«Bilim berý ınfraqurylymyn qoldaý qory» esebinen barlyǵy 76 738 oqýshyǵa arnalǵan 62 mekteptiń qurylysy qarjylandyryldy. Jobalardyń jalpy somasy 96 mlrd teńgeden asty. Qarajat jergilikti atqarýshy organdardyń shottaryna túsken.
Jalpy, qordyń qyzmet etý merzimi ishinde 150 mlrd teńgeden astam qarajat tústi. Olar mektepterdi, qosymsha ǵımarattar men ınternattardy qaıta jańartýǵa, sondaı-aq úsh aýysymdy oqytý, apatty mektepter máselesin sheshýge jáne oqýshy oryndarynyń tapshylyǵyn joıýǵa jumsaldy.
