Qazaqstanda jemqorlyq áreketterdi jarııalaıtyn portal iske qosyldy
ASTANA. KAZINFORM — Elimizde sybaılas jemqorlyqqa qarsy jarııa portal quryldy.
Sybaılas jemqorlyqqa qarsy is-qımyl agenttigi «Ulttyq aqparattyq tehnologııalar» AQ-men birlesip, sybaılas jemqorlyqqa qarsy jarııa portaldy iske qosty. Portal sybaılas jemqorlyqqa qarsy is-qımyl týraly aqparatty bir resýrsta júıeleýge arnalǵan.
— Sybaılas jemqorlyqqa qarsy is-sharalarmen kez kelgen adam tanysa alady. Sondaı-aq portaldy paıdalanýshylar ózderin qyzyqtyratyn, onlaın testileý jáne sertıfıkat alý múmkindigi bar oqý kýrstaryn taba alady. Áleýmettanýlyq zertteýlerge erekshe kóńil bólinedi. Suraqnamadan ótý múmkindigi kózdelgen. Onyń nátıjeleri sybaılas jemqorlyqqa qarsy sharalardy túzetý jáne olardyń tıimdiligin baǵalaý úshin paıdalanylatyn bolady. Sondaı-aq munda Transparency International halyqaralyq uıymynyń jyl saıynǵy zertteý nátıjeleri jáne sybaılas jemqorlyqty júısiný ındeksindegi Qazaqstannyń pozıtsııasy qoljetimdi, — delingen habarlamada.
Sondaı-aq profılaktıkalyq jumysty kúsheıtý maqsatynda, resýrs ishinde «Sybaılas jemqorlyq kartogrammasy» bar.
— Ol jerde sybaılas jemqorlyq táýekelderine shaldyqqan laýazymdar tizimi jáne memlekettik organdar men óńirler boıynsha sybaılas jemqorlyq táýekelderiniń kartasy qamtylǵan. Jumys istep júrgen volonterler men uıymdar týraly aqparat beretin volonterlik qyzmetke arnalǵan bólim sondaı-aq portaldyń mańyzdy elementi. Nıet bildirýshiler erikti retinde kandıdatýrany qaraý úshin saýalnama joldaı alady, — deıdi agenttikten.
Odan bólek, jańa portalda sybaılas jemqorlyqqa qarsy mádenıetti qalyptastyrýǵa, laıyqty minez-qulyqty tárbıeleýge jáne qoǵamda «Zań men tártip» ıdeologııasyn qalyptastyrýǵa baǵyttalǵan beınerolıkter ornalastyrylǵan.
— Sonymen qatar, sybaılas jemqorlyq týraly habarlaýǵa da múmkindik bar. Agenttik barlyǵyn sybaılas jemqorlyqqa qarsy portalǵa kirýge shaqyrady. Ol turaqty túrde ózekti aqparatpen tolyqtyrylyp otyrady. Silteme agenttiktiń resmı saıtynda jáne memlekettik organdardyń ınternet-resýrstarynyń GOV.KZ biryńǵaı platformasynda qoljetimdi, — dep habarlaıdy Antıkor.
Eske sala keteıik, ótken jyly Sybaılas jemqorlyqqa qarsy is-qımyl agenttiginiń tóraǵasy Ashat Jumaǵalı Kazinform agenttigine eksklıýzıvti suhbat berip, jemqorlar tizimi, aktıvterdi qaıtarý, zańsyz kýálikterge qatysty tolyqqandy aqparat bergen edi.