Qazaqstanda jemqorlar 2019 jyly bıýdjetke 5 mlrd teńge shyǵyn keltirgen – agenttik

NUR-SULTAN. QazAqparat – QR Sybaılas jemqorlyqqa qarsy is-qımyl agenttigi Tergeý komıtetiniń bas tergeýshisi Danııar Bekaıdarovtyń aıtýynsha, jemqorlardyń áreketinen 2019 jyly memleketke 5 mlrd teńge zalal keltirilgen, dep habarlaıdy QazAqparat tilshisi.

«Jekelegen teris pıǵyldy laýazymdy adamdar kórsetken senimdi jeke paıda tabý maqsatynda memleket pen qoǵamnyń múddelerine qaıshy paıdalana otyryp, bıýdjet qarajatyn jymqyrýda. Mundaı is-áreketterdiń saldary ulttyń densaýlyǵyna, bolashaǵyna, qorshaǵan ortaǵa jeke zańdy tulǵalardyń jáne memlekettiń zańdy múddelerine qaýip tóndiredi. Olardyń áreketteri orasan zor ekonomıkalyq zııan keltirip, damýdy tejeıdi. Statıstıkalyq málimetterge sáıkes, 2019 jyly sybaılas jemqorlyqqa qarsy qyzmet óndirisinde jemqorlyq faktileri boıynsha 455 qylmystyq is tergeýde bolǵan. Olardyń 319-y sybaılas jemqorlyq boıynsha tirkelgen. 235 is aıaqtalyp, 192-i sotqa joldandy», - dedi Danııar Bekaıdarov agenttikte ótken baspasóz máslıhatynda.

Onyń aıtýyna qaraǵanda, osy qylmystar boıynsha memleketke keltirilgen zalal somasy – 5 mlrd teńgeni quraıdy.

«Qazirgi ýaqytqa deıin 4 mlrd teńgedeı soma bıýdjetke qaıtaryldy. Qazirgi kezde júzdegen mıllıon teńgege qatysty ister tergelýde. Jemqorlyq faktilerdiń kóbi tenderlerdi bólýmen, sharttardy zańsyz jasaýmen, jumystyń oryndalǵany týraly jalǵan aktilermen, jalaqy men issapar shyǵyndaryn zańsyz esepteýmen baılanysty», - dedi ol.