Qazaqstanda jemis-jıdek pen kókónis baǵasy arzandady
ASTANA. QazAqparat - Qazaqstanda 2019 jyldyń aqpanynda azyq-túlik ónimderiniń baǵasy 2018 jyldyń aqpanymen salystyrǵanda orta eseppen 6,6% ósti, dep habarlaıdy QazAqparat QR Ulttyq ekonomıka mınıstrliginiń Statıstıka komıtetine silteme jasap.
Esepti kezeńde nan ónimderi, jarmalar, et, balyq, teńiz ónimderi, sút ónimderi, jumyrtqa, maı, qant, kondıter ónimderi, alkogoldy jáne alkogolsyz sýsyndardyń baǵasy kóterilip, jemis-kókónis arzandaı túsken.
Astyqtardyń biriniń baǵasy kóterilip, basqasy arzandady. Máselen, bıylǵy aqpanda 1 kg kúrishtiń ortasha baǵasy 323 teńge, byltyr 287 teńge bolatyn. Al, ótken jyly 287 teńge bolǵan qaraqumyqtyń baǵasy bıylǵy aqpanda 243 teńgeni qurady.
1 kg qanttyń ortasha baǵasy aqpan aıynda 236 teńge boldy, byltyr ol 195 teńge edi.
2019 jylǵy aqpanda sút ónimderinen súzbeniń ortasha baǵasy 1 kelige 1579 teńgeni qurap otyr (2018 jyldyń aqpanynda - 1511 teńge), qaımaq - 1 050 teńge (994 teńge), máıek irimshigi - 2 565 teńge (2 255 teńge), aıran - 286 teńge (273 teńge), pasterlengen sút - 239 teńge (216 teńge).
