Qazaqstanda jel jáne sý elektr stansalary rentabeldi bolyp sanalady
ASTANA. 21 aqpan. QazAqparat - Qazaqstanda jel jáne sý elektr stansalary rentabeldi bolyp sanalady. Bul týraly Parlament Cenatynyń jalpy otyrysynda QR Premer-Mınıstriniń orynbasary - Indýstrııa jáne jańa tehnologııalar mınıstri Áset Isekeshev osylaı málim etti.
Eske sala ketsek, búgin jalpy otyrysta Senat «Jańartylatyn energııa jónindegi halyqaralyq agenttiktiń Jarǵysyn ratıfıkatsııalaý týraly» qujatty talqylaǵan bolatyn.
«Álemdik baspasózde jel elektr stansalary iri aýqymda rentabeldi emes degen pikir aıtylady. Tehnologııa da, sosyn qashyqta ornalasqan nysandarǵa onyń jetkizilimi de qıyndaý sekildi. Jergilikti jerdegisi túsinikti ǵoı. Degenmen, osy máseleni qalaı zerdeledińizder?» dep surady senator Muhtar Altynbaev.
Al mınıstr Áset Isekeshevtyń aıtýynsha, byltyrǵy jyly jańartylatyn energetıka jónindegi jospardy qabyldaý barysynda álemdik tájirıbeler jan-jaqty saralanǵan.
«Memleket basshysy 2020 jylǵa deıingi energııa teńgerimi týraly jospardy shilde aıyna deıin ázirleýdi tapsyrǵan bolatyn. Onda kómir energetıkasy, atom energetıkasy, jel jáne kún energetıkalarynyń jáne taǵy basqalarynyń úlesteri naqty aıqyndalady. Al búgingi naqty jaǵdaıǵa kelsek, qazir energııa teńgerimi boıynsha bizde balama kún, jel, sý energetıkalary jumys isteýde. Bul rette eń arzan ári ekonomıkalyq tıimdisi sý jáne jel elektr stansasy bolyp tabylady. Al kún energetıkasy álem boıynsha qymbat qýatqa jatady jáne barlyq aımaqta ol sýbsıdııalanady. Eger shyǵyndy keshendi túrde qarastyrsaq, onda jańartylatyn nysandarda operatsııalyq shyǵyndar joq. Al jalpy saraptamalardyń negizinde biz jel jáne sý elektr stansalarynyń elimizde áleýeti joǵary dep sanaımyz», - dedi mınıstr Á. Isekeshev.
Onyń aıtýynsha, sý elektr stansalary negizinen 4 oblysta (Almaty, Ońtústik Qazaqstan, Jambyl jáne Shyǵys Qazaqstan oblystarynda) áleýetti sanalsa, jel elektr stansalary Mańǵystaý, Aqmola, Almaty, Shyǵys Qazaqstan, Qostanaı oblystarynda salýǵa tıimdi.
