Qazaqstanda jekeshelendirýge arnalǵan saıt iske qosylady
ASTANA. KAZINFORM – Elimizde jekege beriletin obektilerdiń tizimi jasaqtalyp, kópshilikke jarııa etiledi. Bul týraly Básekelestikti qorǵaý jáne damytý agenttiginiń tóraǵasy Marat Omarov málim etti.
Elordada Jekeshelendirý ulttyq keńsesiniń alǵashqy otyrysy ótti. Oǵan Májilis depýtattary, memlekettik jáne kvazımemlekettik organdardyń ókilderi men sarapshylar qatysty.
«Búgingi jıynda jekeshelendirýdiń metodologııasy, tásilderi men mehanızmderin qarastyrdyq. Sonymen qatar jumys jospary men kestesin bekittik. Jekeshelendirýge jatatyn obektilerge taldaý jasap, olardyń tizimin jasaqtaımyz. Bizdiń maqsat – jekeshelendirý protsedýrasyn tolyq ashyq ótkizý, ol úshin arnaıy saıt iske qosylady. Jekeshelendirýge birinshi kezekte básekege qabiletti obektiler qaralady, onyń ishinde áleýmettik nysandar da bar. Taǵy bir mańyzdy jaıt, obekti satylǵannan keıin óz beıini boıynsha jumys isteýi», - dedi Marat Omarov otyrys barysynda BAQ ókilderiniń saýalyna jaýap bere turyp.
Agenttik basshysynyń aıtýynsha, jekeshelendirilgen obektilerge mindetti túrde revızııa júrgiziledi.
«Jekeshelendiriletin obektilerdiń aldyn ala tizimi bar, ony shildede naqty jasaqtaımyz. Tizim úlken, áleýmettik nysandardy qospaǵanda 500-den astam obekti bar. Jekeshelendirýge jatatyn obektilerdiń tizimi jarııalanady jáne biz ony keńinen nasıhattap, jarnamalaımyz. Jekeshelendirý saıasatyn júrgizýdegi maqsat – aldymen memlekettik bıýdjetke salmaqty azaıtý, aktıvterdi tıimdi paıdalaný jáne basqarý. Sondaı-aq, kásipkerlikdiń erkin damýyna múmkindik jasaý», - deıdi ol.
