Qazaqstanda jekemenshik túrme bolmaıdy - QR QAJ
ASTANA. QazAqparat - Qazaqstanda jekemenshik túrme bolmaıdy. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR ІІM Qylmystyq atqarý júıesi komıteti tóraǵasynyń orynbasary Janat Keshýbaev málim etti.
Onyń sózine qaraǵanda, memlekettik-jeke seriktestik negizinde túzeý mekemeleriniń qurylysyn júrgizý jaıynda sóz qozǵalǵan. Qazirgi ýaqytta Astanada (tergeý orny), Ońtústik Qazaqstan, Qaraǵandy jáne Soltústik Qazaqstan oblystarynda jergilikti ákimdikter tarabynan túzeý mekemelerin salýǵa jer telimderi bólingen.
Sonymen qatar, ol Іshki ister mınıstrligi elimizdiń Ulttyq ekonomıka mınıstrligine atalǵan oblystarda túzeý mekemeleriniń qurylysyna qatysty ınvestıtsııalyq usynystar jibergenin atap ótti.
«Qalaı bolǵan jaǵdaıda da, derbes túrmeler salý týraly sóz qozǵalǵan emes. Men bul máselege ádeıi nazar aýdartyp otyrmyn. Óıtkeni, jekelegen buqaralyq aqparat quraldarynda Qazaqstanda jekemenshik túrmeler salynbaq degen aqparattar jaryq kórdi. Búgingi tańda jekemenshik túrmeler ustaý týraly sóz qozǵalyp otyrǵan joq», - dedi J.Keshýbaev.
Onyń aıtýynsha, Qazaqstannyń qylmystyq atqarý júıesi úshin memlekettik-jeke seriktestik túri barynsha ońtaıly bolyp otyr. «Aldyn ala iriktep alynǵan model mynadaı: Bul salý jáne paıdalanýǵa berý. Birinshiden, jeke ınvestor kelisimshartqa sáıkes óz qarjysy esebinen túzeý mekemesin salady. Ekinshiden, qurylys jumystary aıaqtalǵan soń kontsessıoner nysany tolyqtaı daıyn kúıinde memleketke tapsyrylady. Úshinshiden, memleket jazalardy oryndaý, mekeme ishindegi sottalýshylardy qadaǵalaý, sonymen birge túzeý mekemesiniń tóńiregin kúzetý qyzmetin tolyq kólemde júzege asyrady», - dedi ol.
Onyń túsindirýinshe, kontsessıonerge (ınvestorǵa) kelisimshartqa sáıkes ınvestıtsııalyq shyǵyndary kezeń-kezeńimen qaıtarylatyn bolady. Sonymen qatar ol atalǵan nysanda kelisimshart merzimi aıaqtalǵanǵa deıin óndiristik-sharýashylyq qyzmetterdi júzege asyrýyn jalǵastyrady.
«Bul rette kontsessıonerge táýekeldersiz kepildendirilgen joba barynsha tıimdi. Ol túzeý mekemesi bazasynda básekege qabiletti ónim shyǵarady, jańa óndiris oryndaryn ashady, óndiristik alańdardy bergeni úshin jaldaý aqysyn alady, óndiriletin ónim memlekettik tapsyrysqa ıe bolady. ıAǵnı, jasalǵan kelisimshart negizinde kıim-keshek, tósek jabyndylary syndy buıymdardy jetkizip turady», - dedi komıtet tóraǵasynyń orynbasary.
