Qazaqstanda jekemenshik medıtsınalyq uıymdardyń alǵashqy forýmy ótedi
ALMATY. 7 aqpan. QazAqparat - Almatyda 8-9 aqpan kúnderi «Qazaqstandaǵy jekemenshik densaýlyq saqtaý salasy: jetistikteri, qazirgi tańdaǵy máseleleri,
olardy sheshý joldary men onyń damý bolashaǵy» degen taqyrypta jekemenshik medıtsına uıymdarynyń alǵashqy forýmy ótedi. Bul jaıly búgin atalmysh jobanyń uıymdastyrýshysy jáne bastamashysy bolyp otyrǵan «Medıtsınalyq qyzmetterdiń sapasy úshin» Qazaqstannyń medıtsınalyq kompanııalarynyń qaýymdastyǵy» men Ulttyq medıtsına qaýymdastyǵy ókilderi baspasóz máslıhatynda málim etti.
«Medıtsınalyq qyzmetterdiń sapasy úshin» Qazaqstannyń medıtsınalyq kompanııalarynyń qaýymdastyǵy» zańdy tulǵalar birlestiginiń Atqarýshy dırektory Leıla Daıyrbaevanyń aıtýynsha, forýmǵa respýblıkamyzdyń barlyq óńirlerinen 200-ge jýyq delegat qatysady. Onyń ishinde bılik ókilderi, densaýlyq saqtaý basqarmasynyń, jekemenshik medıtsınalyq uıymdardyń basshylary, taǵy basqa da tulǵalar bolady dep josparlanyp otyr. Olar jekemenshik medıtsınalyq uıymdar qyzmetiniń zańnamalyq-quqyqtyq jaǵy, kezdesip otyrǵan qıyndyqtary men ákimshilik kedergileri, medıtsınalyq mekemeler qyzmetiniń memlekettik baqylaýyn jetildirý jáne jekemenshik densaýlyq saqtaý salasyn, memlekettik-jekemenshik seriktestik pen ınvestıtsııalardy damytýǵa qatysty usynystardy ázirleý sekildi kókeıtesti máselelerdi keń aýqymda talqylaıtyn bolady. Forým barysynda sondaı-aq, dóńgelek ústel jıyndary men taqyryptyq semınarlar uıymdastyrylmaq. Al jıynnyń sońynda jekemenshik densaýlyq saqtaý salasyn jáne osy saladaǵy memlekettik-jekemenshik seriktestikti damytý jóninde QR Densaýlyq saqtaý mınıstrligine arnalǵan usynystar qamtylǵan forým qararyn qabyldaý josparlanýda.
