Qazaqstanda jeke venchýrlyq kapıtal naryǵyn yntalandyrý qalaı júredi
ASTANA. QazAqparat - Parlament Senatynyń jalpy otyrysynda QR Investıtsııalar jáne damý mınıstri Jeńis Qasymbek venchýrlyq nemese táýekeli joǵary qarjylandyrý salasyndaǵy máselelerdi atady, dep habarlaıdy QazAqparat.
«Jeke venchýrlyq ınvestıtsııalardy tartý arqyly ınnovatsııalyq jáne tehnologııalyq bızneske qoldaý kórsetý álemde keń taraǵan. Onyń kólemi ondaǵan mıllıard AQSh dollaryna jetedi. Mysaly AQSh-ta 52 mlrd dollarǵa jetken. Al Qytaıda onyń deńgeıi 15,5 mlrd, Eýrapalyq odaqta - 10,6 mlrd, Úndistanda - 5 mlrd astam dollardy, Kanadada 1,4 mlrd dollardy qurady», - dep toqtaldy J. Qasymbek venchýrlik qarjylandyrý máseleleri boıynsha zań jobasyn tanystyrý barysynda.
Onyń sózine qaraǵanda, búginde Qazaqstanda venchýrlyq qarjylandyrýdyń naryǵy damymaǵan. Venchýrlyq nemese táýekeli joǵary qarjylandyrýmen aınalysatyn elimizdiń ınvestorlary óz qarjylaryn sheteldik jobalarǵa shetel quzyretteri arqyly baǵyttaıdy. Sol jerlerde olar tıisti salyqtyq jeńildikter alyp, venchýrlyq qarjylandyrý boıynsha sharttardy qurylymdaý úshin sheteldik zańnamany paıdalanady.
Atap aıtqanda, qoljetimdi venchýrlyq ınvestıtsııalardyń bolmaýy ınnovatsııalyq qyzmetti elemizde tejep keledi.
Mınıstrliń sózine qaraǵanda, venchýrlyq naryqty qalyptastyrýdyń birneshe negizgi problemasy baıqalyp otyr. Osy oraıda, venchýrlyq qarjylandyrý boıynsha sharttardyń ereksheligi bolyp tabylatyn qajetti tetikter men kelisim qurylymynyń zańnamada joqtyǵy málesi bar. Ekinshiden, venchýrlyq ınvestıtsııalar úshin salyqtyq jáne basqa da yntalandyrýshy tetikterdiń jetkiliksizdigi baıqalyp otyr.
Mınıstr zań jobasynyń eki negizgi bloktarynyń mazmuny týraly baıandap berdi. Birinshi blok - venchýrlyq qorlar qyzmetiniń quqyqtyq negizi. Birinshiden, Investıtsııalyq qorlar týraly Zańǵa túzetýler eskerilgen. Bul turǵyda túzetýlerdiń negizi jańa túsiniktemeler men anyqtamalardy engizýge arnalǵan.
Ekinshiden, venchýrlyq qorlar formasynyń erekshelikteri, olardyń quqyqtyq erejesi, qyzmeti men olardy basqarý qarastyrylady. Úshinshiden, kelisimderdiń jańa formalary engiziledi.
Ekinshi blok memlekettik qoldaý sharalarynyń quqyqtyq negizine arnalǵan. Osy baǵytta birqatar zańnamaǵa túzetýler qarastyryldy.
«Zań jobasyn qabyldaý arqyly jeke venchýrlyq kapıtal naryǵyn yntalandyrý, tsıfrly jáne basqa da ınnovatsııalyq sheshimderdi ázirleýshilerdiń óz ekojúıelerin damytý, naqty sektordyń ınnovatsııalyq belsendiligin arttyrý, sheteldik ınvestıtsııalardy tartý, jańa jumys oryndaryn ashý, zııatkerlik resýrstar aǵynyn kóbeıtý sııaqty jumystardy atqaramyz. Usynylǵan zań jobasy otandyq jáne sheteldik ınvestıtsııalardy ınnovatsııalyq qyzmetke tartýdyń taǵy bir mańyzdy qadamy»,-dep atap ótti mınıstr.
Parlament Senatynyń jalpy otyrysyndaǵy talqylaýdan keıin, «Qazaqstan Respýblıkasynyń keıbir zańnamalyq aktilerine táýekeldik (venchýrlik) qarjylandyrý máseleleri boıynsha ózgerister men tolyqtyrýlar engizý týraly» Zańy eki oqylymda qabyldandy.
