Qazaqstanda jeke úılerdi satyp alý kórsetkishi kúrt tómendedi
ASTANA. QazAqparat - Qazaqstandyqtardyń jeke úılerdi satyp alýy bir jylda 15% tómendedi, dep habarlaıdy energyprom.kz.
Bıyl naýryzda qazaqstandyqtar 16,8 myń baspana satyp alý-satý mámilesin jasaǵan, bul byltyrǵy kórsetkishten 4,6% az.
Eń joǵary belsendilik Astanada (16% ) tirkelip, 2,7 myńdy quraǵan - bul ótken jyldyń osy kezeńinen 1,4% az. Almatynyń úlesi 12,9% (2,2 myń mámile, byltyrǵydan 16% az) bolsa, Qaraǵandy oblysynda - 10,9% (1,8 myń mámile, 2017 jyldyń naýryzynan 4,8% tómen).
Jyljymaıtyn naryq QR Prezıdentiniń «7-20-25» memlekettik baǵdarlamasynyń bastalýyn kútip otyrýy múmkin. Eske salaıyq, jańa baǵdarlama 2018 jyldyń ekinshi jartysynda júzege asyrylady.
Qazaqstan Ulttyq bankiniń tóraǵasy Danııar Aqyshevtiń aıtýynsha, jańa baspana satyp alýǵa arnalǵan baǵdarlamanyń aýqymy keńeıip, qoldanystaǵy turǵyn úıdi alýǵa múmkindik berýi múmkin.
Kóppáterli úılerdegi satyp alý-satý mámilesiniń sany bir jylda (mınýs 0,1%) ózgeriske ushyraǵan joq deýge bolady jáne 2018 jyldyń naýryzynda 12,3 myń deńgeıinde qaldy.
Jańa kóppáterli úılerdegi páterler orta eseppen 5,6%-ǵa - bir sharshy metrge 263,1 myń teńgege deıin qymbattaǵan.
Qoldanystaǵy jaılastyrylǵan baspana anaǵurlym arzandaǵan (1,3%) - bir sharshy metrine 185,8 teńge.
Ekinshi naryqtaǵy elıtaly turǵyn úı byltyrǵymen salystyrǵanda 2,6% artyp, bir sharshy metrge 211,1 myń teńgeni quraǵan.
