Qazaqstanda jeke taýar markalarynyń úlesi sońǵy úsh jylda eki esege ósti
ASTANA. KAZINFORM – Almatyda NFA Expo-2025 tórtinshi Halyqaralyq tutyný taýarlary kórmesi ashyldy, dep habarlaıdy Saýda jáne ıntegratsııa mınıstrligi.
Bıylǵy sharaǵa Qazaqstan, Qytaı, Italııa, Túrkııa, Reseı, Belarýs, Latvııa jáne Ózbekstandy qosa alǵanda, 9 elden 127 kompanııa qatysýda. Kórmede azyq-túlikke jatpaıtyn rıteıl segmentindegi álemdik jańa ónimder usynyldy.
Ekspozıtsııada qaýipsiz termoplastıkten jasalǵan antımıkrobtyq kesý taqtalary, premıým sanattaǵy turmystyq hımııa, tot baspaıtyn bolattan jasalǵan asúı pyshaqtary, halyqaralyq sertıfıkattalǵan kásiporyndarda óndirilgen zamanaýı turmystyq tehnıka tanystyryldy. Kelýshiler tabıǵı kosmetıka, shyny jáne qaptama ónimderi, HoReCa sektoryna arnalǵan kásibı jabdyqtar jáne úıge, asúıge, demalysqa arnalǵan keń kólemdi taýarlarmen tanysty.
Kórmeniń ashylý rásimine Saýda jáne ıntegratsııa birinshi vıtse-mınıstri Aıjan Bıjanova qatysty. Ol ekspozıtsııalardy aralap kórip, otandyq jáne sheteldik óndirýshilermen birqatar kezdesýler ótkizdi. Óz sózinde vıtse-mınıstr NFA Expo-2025-tiń óndirýshiler úshin ónimderin tanystyrýǵa, al rıteıl ókilderi úshin tıimdi seriktesterdi jyldam tabýǵa múmkindik beretin mańyzdy alań ekenin atap ótti. Onyń aıtýynsha, tikeleı dıalog jańa taýarlardyń naryqqa shyǵýyn jedeldetip, ashyq ári aıqyn yntymaqtastyq sharttaryn qalyptastyrýǵa yqpal etedi.
Aıjan Bıjanova túpki tutynýǵa baǵyttalǵan taýarlardy damytýdyń strategııalyq mańyzyn erekshe atap ótti. Bul segment joǵary qosymsha qun qalyptastyryp, JІÓ ósiminiń negizgi draıverine aınalatynyn aıtty. Sonymen qatar ol saýda jelilerindegi sórelik keńistiktiń keminde 30 paıyzy otandyq azyq-túlik jáne azyq-túlikke jatpaıtyn ónimderge bólinýi qajet degen zań normasyn eske saldy. Bul qazaqstandyq óndirýshilerdiń naryqtaǵy úlesin arttyrýǵa múmkindik beredi.
Mınıstrlik «Bir tereze» tsıfrlyq platformasyn engizý josparlanǵanyn habarlady. Ol otandyq taýar óndirýshiler tizilimimen biriktirilip, qazaqstandyq ónimderdiń rıteılge jedel ári ashyq qoljetimdiligin qamtamasyz etedi.
Kórme aıasynda vıtse-mınıstr Pákistan Senatynyń depýtattarymen kezdesti. Taraptar ekijaqty saýda-ekonomıkalyq yntymaqtastyqty keńeıtý áleýeti joǵary ekenin atap ótip, tutyný taýarlary salasynda áriptestikti nyǵaıtý týraly ýaǵdalasty. 350 mln-nan astam tutynýshysy bar Pákistan kórmege qatysýshy kompanııalar úshin strategııalyq mańyzdy naryq sanalady. Kezdesý barysynda bıznes-qoǵamdastyqtar arasynda tikeleı baılanystar ornatýǵa, rıteıl salasynda tájirıbe almasýǵa jáne turaqty logıstıkalyq tizbekter qurýǵa daıyndyq bildirildi.
Uıymdastyrýshylardyń málimetinshe, NFA Expo-2025 tarıhtaǵy eń keń kategorııalyq qamtýmen ótip jatyr. Kórmede turmystyq hımııa, asúı quraldary, turmystyq tehnıka, kosmetıka, parfıýmerııa, balalar taýarlary, ıntererlik ónimder, baqshaǵa arnalǵan buıymdar, merekelik taýarlar jáne HoReCa sektoryna arnalǵan jabdyqtar usynylǵan.
Bıyl kórmege jańa baǵyt – Retail Tech bólimi qosyldy. Onda rıteılge arnalǵan IT-servıster, tehnologııalyq jabdyqtar jáne tsıfrlyq sheshimder kórsetilýde. Qytaıdyń ulttyq ekspozıtsııasy erekshe nazar aýdartty: ındýstrııalyq provıntsııalardan kelgen kompanııalar turmystyq hımııa, shyny ónimderi, asúı tehnıkasy jáne ydys-aıaqtaryn usyndy.
Kórmeniń basty trendteriniń biri – jeke saýda markalary (private label). Uıymdastyrýshylardyń dereginshe, qatysýshylardyń jartysynan astamy saýda jelilerine arnalǵan taýarlardy kelisimsharttyq óndirýge daıyn. NielsenIQ málimetinshe, sońǵy úsh jylda Qazaqstanda jeke markalardyń úlesi eki esege jýyq ósken, al satyp alýshylardyń 60 paıyzdan astamy mundaı ónimderdi aıyna keminde bir ret satyp alady.
Kórmeniń alǵashqy kúninen bastap iri rıteıl ókilderi – Magnum, Small, Anvar, Toimart, Airba Fresh, Korzinka, Wildberries, Flip.kz, Fix Price, bi1, Globus jáne basqa da jeliler óndirýshilermen kelissózder júrgizip jatyr. Qatysýshylar úshin sertıfıkattaý, qaptama, logıstıka, shıkizatpen qamtamasyz etý jáne eksporttyq baǵyttar boıynsha keńes berý aımaǵy uıymdastyrylǵan.
Aldaǵy úsh kún ishinde NFA Expo-2025 jańa brendterdiń tanystyrylymy, sheberlik sabaqtary, ónim kórsetilimderi men iskerlik kezdesýler ótetin negizgi alańǵa aınalady. Kórme 28 qarashaǵa deıin jalǵasady.
Shara QR Saýda jáne ıntegratsııa mınıstrligi men «Atameken» Ulttyq kásipkerler palatasynyń qoldaýymen ótip jatyr.
Aıta keteıik, Mınskide ótken saýda mıssııasy nátıjesinde 5 mln dollarlyq kelisimshart jasaldy.